PSG-ის ვარსკვლავი ბაზაზე €21 000-იანი ფურგონით მივიდა | Marca-მ ის კვარას მანქანას შეადარა
ფეხბურთელების ვარსკვლავური სტატუსი ხშირად მათ ავტომობილებზეც აისახება — უიშვიათესი სუპერქარებიდან დაწყებული, ძვირად ღირებული კლასიკური მოდელებით დასრულებული, ცნობილი ფეხბურთელების კოლექციაში არაერთ ავტომობილს იხილავთ. თუმცა, „პარი სენ-ჟერმენის“ ახალგაზრდა ფეხბურთელმა ამ ტენდენციისგან მკვეთრად „გადაუხვია“ და გასულ ვარჯიშზე თავისი არჩევანით ყურადღებაც მიიქცია.
21 წლის პორტუგალიელი ჟოაუ ნევეში PSG-ის საწვრთნელ ბაზაზე Peugeot Partner-ის კომერციული ფურგონით მივიდა. ახალგაზრდა ფეხბურთელი პარიზული კლუბის ერთ-ერთი ძირითადი მოთამაშეა და ზაფხულში მისი მადრიდის „რეალში“ გადასვლაც განიხილებოდა. ამის მიუხედავადაც, ძვირად ღირებული ავტომობილის ნაცვლად ნევეშმა ერთი უბრალო და პრაქტიკული სატრანსპორტო საშუალება აირჩია, რითაც, ალბათ, თანაგუნდელების გაკვირვება სურდა.
MARCA-ს ინფორმაციით, ნევეშის ავტომობილი 102 ცხენის ძალის მქონე ძრავით აღჭურვილი Peugeot Partner BlueHDi-ია. განსაკუთრებით საინტერესოა ის ფაქტი, რომ ავტომობილი კომერციული ვერსიაა და სტანდარტული შენადნობი დისკები უყენია. საინტერესოა ისიც, რომ მანქანას პორტუგალიური სანომრე ნიშნები აქვს.
View this post on Instagram
ნევეშის არჩევანი კიდევ უფრო უჩვეულოდ გამოიყურება PSG-ის სხვა ფეხბურთელების ავტომობილების ფონზე. მაგალითად, ესპანური გამოცემა Marca აღნიშნავს, რომ ნევეშის €21 000-იანი ფურგონი €350 000-იანი Rolls-Royce-ის გვერდით უცნაური სანახავია. ამ Rolls-Royce Spectre-ით კი PSG-ის ქართველი ფეხბურთელი, ხვიჩა კვარაცხელია, გადაადგილდება.
როგორც Marca წერს, Peugeot Partner-ის ფასი დაახლოებით 21 000 ევროა, ანუ თითქმის 16-ჯერ ნაკლებია კვარაცხელიას Rolls-Royce-ის ღირებულებაზე.
თუმცა, ეს პირველი შემთხვევა არაა, როდესაც PSG-ის ფეხბურთელებმა ავტომობილებში უცნაური არჩევანით მიიპყრეს ყურადღება. მაგალითად, რამდენიმე კვირის წინ მსოფლიო ჩემპიონი ფაბიან რუისი საწვრთნელ ბაზაზე პატარა Smart Fortwo-ით მივიდა. თუმცა, ნევეშისგან განსხვავებით, ეს Brabus-ის მიერ მოდიფიცირებული სპორტული ვერსია იყო.
