ევროპის კავშირში ელექტრომობილების გაყიდვები თითქმის 63%-ით გაიზარდა | მიზეზები
აგვისტოში, ევროპის კავშირის მასშტაბით, ელექტრომობილების გაყიდვები მკვეთრად გაიზარდა. ახალი ავტომობილების რეგისტრაციები, გასული წლის ანალოგიურ პერიოდთან შედარებით, 63%-ითაა გაზრდილი, რაც, სხვა ფაქტორებთან ერთად, საწვავზე რეკორდული ფასებისა და ელექტრომობილებზე მოქმედი სუბსიდიების დამსახურებაა.
ასევე დაგაინტერესებთ: რამდენად უსაფრთხოა ელექტრო ავტომობილები?
ევროპული ავტომობილების მწარმოებელთა ასოციაციის (ACEA) მონაცემებით, აგვისტოში ბატარეაზე მომუშავე ავტომობილების გაყიდვები, წლიურ ჭრილში, 62.7%-ითაა გაზრდილი. შედეგად, სრულად ელექტრო ავტომობილების წილი ორგანიზაციის ახალი ავტომობილების ბაზარზე 17.8%-დან 27.7%-მდე ავიდა. ამასთან, ბლოკის 27 ქვეყანაში ახალი ავტომობილების საერთო გაყიდვები 4.5%-ით გაიზარდა, ხოლო 2026 წლის პირველ რვა თვეში წლიურ ჭრილში მატება 5.3%-ს შეადგენდა.
EY-ის ანალიზის თანახმად, ამ ზრდის უკან ორი მამოძრავებელი ფაქტორია — ერთი, ელექტრომობილებზე სუბსიდიები და მეორე, ბევრ ქვეყანაში გასული წლის აგვისტოსთან შედარებით ერთი დამატებითი სამუშაო დღე.
თუმცა, EY-ის გლობალური საავტომობილო და მობილობის ინდუსტრიის მიმართულების ხელმძღვანელი კონსტანტინ გალლი მიიჩნევს, რომ ეს მონაცემები ევროპული ავტობაზრის ფართო აღდგენის ნიშნად არ უნდა ჩაითვალოს. მისი შეფასებით, ზრდა უმეტესად EV-ებზე მოქმედი სუბსიდიებითაა განპირობებული, მათი დასრულების შემდეგ კი, არაა გამორიცხული, ელექტრომობილების გაყიდვები მკვეთრად შემცირდეს.
აგვისტოში გაიზარდა plug-in ჰიბრიდების რეგისტრაციებიც — 11%-ით, ხოლო ტრადიციული ჰიბრიდების ზრდამ 2% შეადგინა. ჰიბრიდები კვლავ ყველაზე პოპულარულ სისტემად რჩება და აგვისტოში ახალი ავტომობილების დაახლოებით მესამედს შეადგენდა. 2026 წლის აგვისტოს შედეგებით, მათი წილი 36.6% იყო. ამავე პერიოდში სრულად ელექტრო ავტომობილებისა და ბენზინზე მომუშავე ავტომობილების წილი 21.7%-21.7%-ს შეადგენდა.
აგვისტოში, ელექტრომობილების გაყიდვებით, ევროპული ბლოკის წევრებს შორის გერმანია ლიდერობდა — ქვეყანაში თითქმის 69 000 ახალი EV დარეგისტრირდა. მეორე ადგილზე საფრანგეთი იყო, 36 000-ზე მეტი ავტომობილით, შემდეგ კი დანია, ბელგია და ნიდერლანდები მოდიოდნენ.
ამას ევროპის კავშირის ავტობაზარზე ჩინური კომპანიების პოზიციების მოძლიერებაც ემატება. ACEA-ს მიერ შეფასებული ხუთი კონკრეტული ჩინური კომპანიის გაყიდვები აგვისტოში წლიურად დაახლოებით 71%-ითაა გაზრდილი. ერთობლივი წილი კი, ბლოკის ავტობაზარზე, 6.6%-დან 10.8%-მდე გაიზარდა. ყველაზე სწრაფი ზრდა Leapmotor-მა აჩვენა — 211%. Chery-ის გაყიდვები 201%-ით, BYD-ის 129%-ით, Geely Group-ის კი 24%-ითაა მომატებული.
