Tesla-ს ისევ უჩივიან: ავტოპილოტმა შუქნიშნის წითელი ნათება დააიგნორა

წარმოიდგინეთ, შეჩერდით გზაზე, რადგან შუქნიშანი წითლად ანათებს — უეცრად, ყოველგვარი გაფრთხილების გარეშე, თქვენი ავტომობილი თვითნებურად იწყებს აჩქარებას და პარალელურად წინააღმდეგობას გიწევთ, როდესაც მართვის სადავეების ხელში აღებას ცდილობთ. სწორედ ამას ამტკიცებს ვაშინგტონში მცხოვრები ოჯახი თავის Tesla Model X-თან დაკავშირებით. ეს ინციდენტი ახალი სასამართლო დავის საგანი გახდა, ხოლო სიმართლის დადგენა მხოლოდ ავტომობილის მონაცემთა ბაზის კვლევით იქნება შესაძლებელი.

ასევე იხილეთ:  8 პრობლემა ელექტრომობილის ფლობისას, რომელზეც არავინ საუბრობს 

ტელეკომპანია KING 5-ის ცნობით, 2023 წლის 29 ივნისს ლინ ნგუენი 14 წლის ქალიშვილთან ერთად ქალაქ ქირქლენდში, გზაჯვარედინზე იდგა. სარჩელის მიხედვით, მათმა 2023 წლის Model X-მა უეცრად თვითნებურად მოუმატა სიჩქარეს, შეიჭრა გზაჯვარედინზე და ბორდიურს შეეჯახა. ბედნიერი შემთხვევის წყალობით, ავტომობილი სხვა ტრანსპორტს არ დაჯახებია.

ნგუენის თქმით, შეჯახების შედეგად მან მიიღო კისრის, ზურგის, მხრისა და მუხლების დაზიანებები, ასევე აწუხებდა თავბრუსხვევა და დაბნეულობა. სარჩელში აღნიშნულია, რომ დაშავდა მისი ქალიშვილიც, რომელმაც მძიმე ემოციური სტრესი გადაიტანა. ოჯახი Tesla-სგან სამედიცინო მკურნალობის ხარჯებისა და მიყენებული ზიანის ანაზღაურებას ითხოვს.

სასამართლო დავაში ხელის გაშვერა Autopilot-ის სისტემისკენ ხდება — სარჩელში აღნიშნულია, რომ სისტემამ ვერ შეძლო SUV-ის გაჩერებულ მდგომარეობაში შენარჩუნება, აჩქარდა მძღოლის ჩარევის გარეშე და ხელი შეუშალა მას მუხრუჭით ან საჭით კონტროლის აღდგენაში. ნგუენი ასევე აცხადებს, რომ მან ამ ტექნოლოგიაში დამატებით 15 000 დოლარი გადაიხადა. ეს დეტალი გარკვეულ კითხვებს აჩენს: Tesla-ს საბაზო Autopilot-ში ასეთი თანხა არასდროს მოუთხოვია, თუმცა სწორედ 15 000 დოლარი ღირდა Full Self-Driving (სრული თვითმართვადობის) პაკეტი. შესაბამისად, გაურკვეველია, კონკრეტულად რომელ სისტემას ადანაშაულებს მძღოლი ავარიის გამოწვევაში.

მიუხედავად ამისა, მსგავს ბრალდებებს პრეცედენტი გაჩნია. კალიფორნიაში მომხდარი Model X-ის ფატალური ავარიის გამოძიების შემდეგ, NTSB-მა დაასკვნა, რომ Autopilot-მა ავტომობილი მაგისტრალის გამყოფ ზოლში შეიყვანა, თუმცა იქვე აღნიშნა მძღოლის მხრიდან რეაგირების არარსებობაც. რა თქმა უნდა, მოძრაობისას ზოლის შეცვლა და გაჩერებული ავტომობილის მიერ 0-100 კმ/სთ ტესტის გაფრთხილების გარეშე დაწყება სრულიად განსხვავებული რამ არის.

საჯარო ანგარიშში ჯერჯერობით არ არის წარმოდგენილი ისეთი მონაცემები, როგორებიცაა აქსელერატორის პოზიცია, მუხრუჭის დაჭერის ძალა, სიჩქარე, საჭის კუთხე და ასისტენტების სტატუსი. თითოეულ ამ დეტალს გადამწყვეტი მნიშვნელობა ექნება იმის დასადგენად, თუ რა მოხდა სინამდვილეში. ავტომობილების უეცარ აჩქარებასთან დაკავშირებული წინა საჩივრების განხილვისას, NHTSA-მ 118 ინციდენტის მონაცემები შეისწავლა. უწყებამ დაადგინა, რომ ყველა შემთხვევაში, სადაც მონაცემები ხელმისაწვდომი იყო, ავარია მძღოლის მიერ სატერფულის შეშლამ (მუხრუჭის ნაცვლად აქსელერატორზე დაჭერამ) გამოიწვია და ავტომობილის ან მუხრუჭების გაუმართაობის არანაირი მტკიცებულება არ გამოვლენილა. სანამ ამ შემთხვევის მონაცემები არ გამოქვეყნდება, ბევრი ივარაუდებს, რომ ესეც მორიგი მსგავსი ინციდენტია.