აუქციონზე ეს უნიკალური Buick GNX-ი თავდაპირველზე 15-ჯერ ძვირად გაიყიდა

Buick GNX-ი 1987 წელს შეიქმნა, როგორც Buick Grand National-ის საუკეთესო ვერსია. ამ უკვე ლეგენდარული მასლქარის სრულიად განსაკუთრებულ ავტომობილად გარდასაქმნელად Buick-ი კომპანია ASC/McLaren-თან თანამშრომლობდა. თითოეული GNX-ი ექსკლუზიურად შავ ფერში გამოდიოდა. მას ჰქონდა კომპოზიტური მასალისგან დამზადებული განიერი თაღები, ფრთებზე განთავსებული ფუნქციური ჰაერამღებები, სამნაწილიანი უკანა სპოილერი და სპეციალური 16-დუიმიანი დისკები, რაც ავტომობილს აგრესიულ, „ბოროტ“ იერსახეს ანიჭებდა — ერთი სიტყვით, ამ მოდელს ჰქონდა ყველაფერი, რაც მის მომავალ დიდებაზე მეტყველებდა.

კაპოტის ქვეშ 3.8-ლიტრიანი ტურბო-V6 ძრავი იმალებოდა, რომელიც 4-სიჩქარიან ავტომატურ გადაცემათა კოლოფთან და უკანა ამძრაობასთან იყო წყვილში. ქარხნულად Buick-ი მისი სიმძლავრეს 276 ცხენის ძალით აფასებდა, თუმცა მოგვიანებით ჩატარებულმა ტესტებმა აჩვენა, რომ რეალურად ავტომობილი ბევრად მეტს გამოიმუშავებდა. GNX-ი თავისი ეპოქისთვის წარმოუდგენლად სწრაფი იყო და იმ პერიოდის ტესტებში ბევრად უფრო ეგზოტიკურ და ძვირადღირებულ სუპერქარებსაც კი უწევდა კონკურენციას.

ამ კონკრეტული ავტომობილის შემთხვევაში ყველაზე გიჟური დეტალი მისი გარბენია. ეს ეგზემპლარი გამოშვებული 547 ერთეულიდან 450-ე ნომერია და მისი ოდომეტრი სულ რაღაც 30 მილს (48 კმ) უჩვენებს! ავტომობილი 1987 წელს თავდაპირველად $29 389 დოლარად შეიძინეს. მას სრულად შენარჩუნებული აქვს ქარხნული შავი ძარა და ორფეროვანი სალონი. კომპლექტაციაში მოჰყვება 1987 წლის მინის სტიკერის ასლები და Carfax-ის სუფთა ისტორია, სადაც არცერთი ავარია თუ დაზიანება არ ფიქსირდება. ავტომობილისთვის, რომელიც თითქმის 40 წლისაა, ეს დიდებული მაჩვენებლებია.

ასტრონომიული ფასი აუქციონზე

ამ GNX-ის მფლობელობის ბოლო დროინდელი ისტორია ისეთივე საინტერესოა, როგორც მისი გარბენი. Bring a Trailer-ის აუქციონის ჩანაწერების მიხედვით, ავტომობილი 2024 წლის 1 ივლისს $220 000 დოლარად გაიყიდა, რის შემდეგაც, სულ რაღაც ცხრა დღეში, მფლობელი კვლავ შეიცვალა $200 000 დოლარად.

2026 წლის სექტემბერში კი ავტომობილი გასაყიდად ტეხასის შტატში, ქალაქ ქეროლტონში მდებარე სადილერომ გამოიტანა. ამჯერად ვაჭრობა ასტრონომიულ $427 000 დოლარამდე გაიზარდა — 57 ბიჯის განხორციელების შემდეგ აუქციონი 24 სექტემბერს დასრულდა. საბოლოო გასაყიდი ფასი დაახლოებით 14.5-ჯერ აღემატება იმ თანხას, რაც პირველმა მფლობელმა 1987 წელს გადაიხადა!