ბელგიაში Tesla-ს FSD სისტემა გამოცადეს: ავტოპილოტი მოძრაობის წესებს არღვევს
Tesla-ს სრული ავტონომიური მართვის სისტემას სიჩქარის შეზღუდვების აღქმასთან დაკავშირებით სერიოზული პრობლემები აქვს — ასეთია ბელგიური საგზაო უსაფრთხოების ორგანიზაციის დასკვნა. ბრიუსელში ჩატარებული ტესტების დროს, ავტოპილოტმა 30 კმ/სთ სიჩქარის შეზღუდვის ნიშანი დააფიქსირა, თუმცა მძღოლის ეკრანზე მაინც 50 კმ/სთ გამოსახა და სიჩქარეს საგრძნობლად გადააჭარბა.
ასევე იხილეთ: 8 პრობლემა ელექტრომობილის ფლობისას, რომელზეც არავინ საუბრობს
ეს აღმოჩენა საკმაოდ უსიამოვნოა ამერიკული ავტომწარმოებლისთვის, რომელიც ამჟამად ევროკავშირის მასშტაბით FSD სისტემის ოფიციალურ დამტკიცებასა და ავტორიზაციას ელოდება.
არასამთავრობო ორგანიზაცია Johanna.be-მ 3-დღიანი ტესტირებისას Tesla Model 3-ით დაახლოებით 400 კილომეტრი გაიარა. 36-გვერდიანი ანგარიში ძირითადად იმ ქუჩებზე კონცენტრირდება, სადაც ქვეითები და ველოსიპედისტები ყველაზე მეტად არიან დაუცველნი.
კვლევამ რამდენიმე კრიტიკული ხარვეზი გამოავლინა — დედაქალაქის 30 კმ/სთ-იან ზონებში, FSD-მ 29 შემოწმებული მონაკვეთიდან 16-ზე გადააჭარბა სიჩქარეს — ამ მონაკვეთებზე მაქსიმალურმა საშუალო სიჩქარემ 44 კმ/სთ შეადგინა. გარდა ამისა, შემოწმებული მონაკვეთების 90%-ზე ავტომობილმა მძღოლს არასწორი, იმაზე მაღალი სიჩქარის შეზღუდვა აჩვენა, ვიდრე სინამდვილეში იყო დაშვებული. ზოგჯერ სისტემა წამიერად აფიქსირებდა 30 კმ/სთ ნიშანს, შემდეგ კი ეკრანზე ისევ 50 კმ/სთ-ს ტვირთავდა.
20 კმ/სთ-იან ზონებში ჩატარებული 12 ტესტიდან სისტემამ სიჩქარეს 5 შემთხვევაში გადააჭარბა. ბოლოს კი, სპეციალურ ქუჩებზე, სადაც ავტომობილებს ველოსიპედისტის გასწრება კანონით ეკრძალებათ, Tesla-ს FSD რამდენჯერმე შეეცადა მათ გადასწრებას, რაც მძღოლის ჩარევით აღიკვეთა.
სამართლიანობისთვის, ანგარიშში აღნიშნულია, რომ FSD ზოგადად კორექტულად და ზრდილობიანად იქცევა ქვეითებისა და ველოსიპედისტების მიმართ და მათ გზას უთმობს. თუმცა „ზრდილობიანი ავტომობილი“, რომელიც მძღოლს მცდარ სიჩქარეს სთავაზობს, საგზაო უსაფრთხოებისთვის მაინც საფრთხეს წარმოადგენს. აპრილში ნიდერლანდების სატრანსპორტო უწყებამ და მოგვიანებით ბელგიამ ტესლას FSD-ის გამოყენების ნება დართეს. Johanna.be-მ ორივე ქვეყნის რეგულატორებს მოუწოდა, გადახედონ თავიანთ გადაწყვეტილებას ევროკავშირის მასშტაბით მოსალოდნელ კენჭისყრამდე.
