Toyota Hilux-მა კონტროლი დაკარგა და ჰაერში აიჭრა

ავსტრალიაში Toyota Hilux-ის მძღოლი და მის გვერდით მჯდომი მგზავრი უმძიმეს ავარიას გადაურჩნენ.

მათ უკან მომავალი მანქანის სალონიდან გადაღებულ ვიდეოში შავი Toyota Hilux-ი კარგად ჩანს. მის წინ Toyota C-HR-ი მიდის. მას შემდეგ, რაც გზა ორ დამოუკიდებელ ზოლად იყოფა Hilux-ის მძღოლი საჭეს მკვეთრად იღებს და წყვეტილ ხაზს კვეთს. როგორც ჩანს, ამ მანევრის შესრულებისას მას აქსელერატორის სატერფულიდან ფეხი არ აუღია, რასაც კონტროლის დაკარგვა მოჰყვა.

ასევე იხილეთ: როგორ გაანადგურეს სამოქალაქო პიკაპებმა მუამარ კადაფის ტანკები?

პიკაპი მთელი სისწრაფით გზის მარჯვნივ გადავიდა და მოსრიალდა. საბოლოოდ Toyota ბალახზე აღმოჩნდა, რომლის ბოლოსაც პატარა ბორცვი იყო. ამ ტრამპლინივით რელიეფმა კი Hilux-ი ჰაერში გაუშვა.

YouTube-ზე გავრცელებული ვიდეოს აღწერაში ვკითხულობთ, რომ Hilux-ი სკოლის გზაზე მიდიოდა. საბედნიეროდ მასში მსხდომი ადამიანები უვნებლად გადარჩნენ.

ის, თუ როგორ მარტივად დაკარგა Toyota-მ კონტროლი ნამდვილად გასაკვირია. სავარაუდოდ, მანქანა ამ მომენტში მხოლოდ უკანა ხიდით მუშაობდა. შედეგად, აქსელერატორის სატერფულზე ფეხის შენარჩუნებამ კონტროლის დაკარგვა და ბალახის საფარზე გადასვლა გამოიწვია. არ არის გამორიცხული ისიც, რომ Hilux-ის საბურავები ბოლომდე გაცვეთილი იყო, რამაც მოცურების პროვოცირება გამოიწვია.