ჩინურ შიდა ბაზარს პრობლემები აქვს | ავტომწარმოებლები ექსპორტით გადარჩენას ცდილობენ

იმის გასაგებად, თუ რატომ ცდილობს ჩინეთის ავტოინდუსტრია ასე გააფთრებით თავისი ავტომობილების საზღვარგარეთ გატანას, პეკინის რომელიმე ავტოსალონში ვიზიტიც საკმარისია. შემოდგომა ჩინეთში ტრადიციულად ავტომობილების გაყიდვის პიკურ პერიოდად ითვლებოდა, თუმცა წელს შოურუმების უმეტესობა ან ცარიელია, ან საერთოდ დახურული.

ასევე იხილეთ: 8 პრობლემა ელექტრომობილის ფლობისას, რომელზეც არავინ საუბრობს

ავტოსალონის კონსულტანტმა CNBC-სთან საუბარში განაცხადა, რომ COVID-19-ის პანდემიის პერიოდს თუ არ ჩავთვლით, 2026 წლის ეს სეზონი ყველაზე პასიურია იმ 26 წლის განმავლობაში, რაც ის ამ სფეროში მუშაობს.

„გასულ წლებში მომხმარებლები შოურუმებში უწყვეტ ნაკადად შემოდიოდნენ, ხელშეკრულებებს ყოველდღიურად ვაფორმებდით. დღეს კი კვირაში მხოლოდ 2–3 გარიგებას თუ ვდებთ. ეს კოლოსალური ვარდნაა“, — განაცხადა ლი ქემ.

რატომ აღარ ყიდულობენ ჩინელები ავტომობილებს?

ბოლო მონაცემებით, ჩინეთში მოსახლეობა ავტომობილების ყიდვისგან თავის შეკავებას იწყებს, რადგან არასტაბილურმა დასაქმების ბაზარმა და უძრავი ქონების ფასების უწყვეტმა ცვლილებამ მომხმარებელთა ნდობა სერიოზულად შეარყია. ამას ემატება ისიც, რომ სახელმწიფომ შეამცირა ისეთი ბენეფიტები, როგორებიცაა ძველი მანქანების ჩაბარების სუბსიდიები და ელექტრომობილებზე საგადასახადო შეღავათები.

ჩინეთის სამგზავრო ავტომობილების ასოციაციის მონაცემებით, 2026 წლის სექტემბრის ჩათვლით, ჩინეთში სამგზავრო ავტომობილების საცალო გაყიდვებმა 13.33 მილიონი ერთეული შეადგინა, რაც გასული წლის ანალოგიურ პერიოდთან შედარებით 21.7%-ით ნაკლებია. ასევე, 2026 წლის სრული წლის პროგნოზით, ჩინეთის შიდა საცალო გაყიდვები 22%-ით დაეცემა და 18.5 მილიონ ავტომობილს გაუტოლდება — რაც პანდემიის პირველი წლის მაჩვენებელზე დაბალი ნიშნულია.

მძიმე დღეშია ელექტრომობილების სექტორიც, რომელიც ადრე ბაზრის მთავარ მამოძრავებელ ძალად ითვლებოდა. შიგაწვისძრავიანი ბენზინის ავტომობილების გაყიდვები ჩინეთში ისედაც მცირდებოდა ელექტრომობილებზე მასობრივი გადასვლის გამო, თუმცა ელექტრიფიცირებული მოდელების გაყიდვებიც კი იანვრიდან სექტემბრამდე 12.8%-ით შემცირდა.

„მომხმარებლები თითოეულ იუანს ითვლიან — ახალი მოდელების ფუნქციების თვალიერებისას, ისინი საზღვრავენ, რა არის მათთვის ყველაზე პრაქტიკული, ეკონომიური და გრძელვადიან პერსპექტივაში გამართლებული. იმპულსურ ყიდვებს ვეღარ ვხედავთ. მძიმე ეკონომიკური ფონის გამო, ხალხი მანქანის განახლებას ბევრად უფრო დიდხანს აჭიანურებს“, — განაცხადა კონსულტანტმა.

შიდა ბაზარზე არსებულმა სასტიკმა კონკურენციამ ბოლო წლებში გამანადგურებელი ფასების ომი გამოიწვია. ანალიტიკოსების თქმით, სწორედ ეს არის მთავარი მიზეზი, რის გამოც ჩინურმა ავტომწარმოებლებმა მზერა უცხოურ ბაზრებს მიაპყრეს. ამავდროულად, პეკინს სერიოზულად აშინებს ის ფაქტი, რომ აშშ-მა და ევროპამ შესაძლოა კოორდინირებული სავაჭრო ბარიერები აღმართონ ჩინური ავტოექსპორტის წინააღმდეგ.

ჩინეთის სტატისტიკის ეროვნული ბიუროს მონაცემებით, წლის პირველ ცხრა თვეში სამრეწველო მოგება წლიურად 15.5%-ით გაიზარდა, თუმცა სექტემბერმა უკვე სუსტი დინამიკა აჩვენა. კონკრეტულად საავტომობილო სექტორში კი მოგება იანვარ-სექტემბერში, გასულ წელთან შედარებით, 22.8%-ით შემცირდა.