Audi Spyder - კომპანიის უარი დამკვეთებს

Audi ყოველთვის განსხვავებული სტილის მანქანებს აწარმოებდა. ამ ავტომობილებს სახასიათო სტილი ჰქონდათ და მის ქომაგებსაც სწორედ ეს მოსწონდათ. თუმცა ამ კომპანიის სამოდელო სიაში სპორტული ვერსიები 90-იან წლებამდე ბევრი არ მოიძებნებოდა, შესაბამისად კომპანიას ძალიან სურდა, რომ მათაც შეექმნათ ისეთი სპორტული მოდელი, რომელიც კონკურენტების გვერდით ღირსეულ ადგილს დაიკავებდა. 1991 წელს გერმანულმა კომპანიამ Audi Spyder Concept-ი წარადგინა, რომელიც რეგულარული და კონსერვატიული მოდელებისგან სრულად განსხვავებული იყო. მიუხედავად იმისა, რომ ავტომობილის შესახებ დიდი ინფორმაცია არ არსებობდა, წარდგენიდან მალევე კომპანიაში ათასობით შეკვეთა შევიდა.

ავტომობილი 1100 კილოგრამს იწონიდა, რაც ალუმინის ძარის დამსახურება იყო. Spyder-ს სრულად ამძრავი კონფიგურაცია ჰქონდა და მისი ძრავა 2.8-ლიტრიანი იყო, რომელიც 172 ცხენის ძალას გამოიმუშავებდა. ეს მაჩვენებელი საკმარისი არ იყო იმისათვის, რომ იმ დროინდელი სუპერქარებისთვის შესაბამისი კონკურენცია გაეწია. მიუხედავად ბევრი შეკვეთისა, კომპანიამ საპირისპირო გადაწყვეტილება მიიღო და Spyder-ი სერიულ წარმოებაში არ ჩაუშვა.

ამ კონცეპტუალური მოდელის წარდგენიდან მალევე Audi-მ Avus-ი გამოაგორა მზის სინათლეზე, რომელიც ასევე კონცეპტუალურ ხასიათს ატარებდა. თუმცა საკმაოდ დიდი დროის შემდეგ გერმანულმა კომპანიამ მაინც მოახერხა და მსოფლიოს Audi R8 წარუდგინა. ეს ყველაფერი კი 1991 წელს Spyder-ის იდეამ განაპირობა და მიუხედავად იმისა, რომ ეს ავტომობილი მხოლოდ 2 ეგზემპლარად დამზადდა, მან საფუძველი ჩაუყარა ისეთ მოდელს, რომელმაც Audi სხვა საფეხურზე აიყვანა.