შესაძლოა, Audi-მ A8-ის წარმოება შეაჩეროს

როგორც ჩანს, Audi A8 თავისი გზის დასასრულს მიუახლოვდა. ამჟამინდელი მოდელი 2017 წლიდან გამოდის და, მიუხედავად იმისა, რომ ამ პერიოდში რესტაილინგი განიცადა, გერმანულ ავტომწარმოებელს ჯერ არ დაუდასტურებია, ეყოლება თუ არა მას მემკვიდრე. ფლაგმანი სედანი, რომელიც ერთ დროს Audi-ს ტექნოლოგიური სავიზიტო ბარათი იყო, ახლა გზაგასაყარზე დგას. 

თუ წარმოება მართლაც შეწყდება, ეს უკანასკნელ 30 წელიწადში პირველი შემთხვევა იქნება, როცა აუდის BMW-ს 7 Series-ისა და Mercedes S-Class-ის პირდაპირი კონკურენტი არ ეყოლება. ამ გაუგებრობაში Audi მარტო არ იქნება, რადგან თავის ერთ-ერთ ყველაზე ხანგრძლივ მოდელ LS-ს Lexus-იც აჩერებს, თუმცა აქ მიზეზი გასაგები მაინც არის — იაპონური ბრენდი 6-ბორბლიან მინივენზე მუშაობს. 

A8-ის ბედის ბუნდოვანება ახალი ამბავი არ არის. თავდაპირველად, აუდი აპირებდა, რომ მოდელს არა ერთი, არამედ ორი სრულად ელექტრო მემკვიდრე ჰყოლოდა (და ეს 2027 წლამდე უნდა მომხდარიყო) — როგორც ჩანს, ამ გეგმის ხორცშესხმას უახლოეს მომავალში არ უნდა ველოდოთ. გეგმის მიხედვით, მომდევნო თაობის A8-ს პლატფორმა პორშეს მიერ დაანონსებულ ელექტრო ქროსოვერ K1-თან უნდა გაეზიარებინა, თუმცა ეს პროექტი განუსაზღვრელი ვადით გადაიდო. Porsche-მ განსხვავებული ჰიბრიდული მომენტის განვითარება გადაწყვიტა.   

პრობლემებს ემატება ელექტრომობილების გაყიდვების დაბალი მაჩვენებლებიც გლობალურ ბაზრებზე, რაც ელექტრო ფლაგმანების პროექტს კითხვის ნიშნის ქვეშ აყენებს.

პლატფორმის ძიებაში

ამჟამინდელი A8 2017 წლიდან პლატფორმა MLB evo-ს ეყრდნობა და Audi-ს განცხადებით, ამაზე შორს ამ არქიტექტურის ფუნქციონირება ვეღარ გაიჭიმება — თანამედროვე სტანდარტების შესაბამისად MLB ვეღარ განახლდება. 

MLB evo-ს გარდა, ჩამოწერის კანდიდატია MSB პლატფორმაც, რომელსაც Volkswagen Group 2016 წლიდან იყენებს ისეთ მოდელებში, როგორებიც Porsche Panamera და Bentley Continental არიან. 

ერთ-ერთ გამოსავლად განიხილება აუდის ახალი PPC არქიტექტურა, რომლის გამოყენებაც ახალი თაობის Q7-ებსა და Q9-ზე იგეგმება. შიგაწვის ძრავის შენარჩუნებამ, შესაძლოა გერმანულ ავტომწარმოებელს 2030-იან წლებამდე მოქმედებისთვის სივრცე მისცეს, თუმცა ჯერჯერობით A8-ის ბედი მაინც გაურკვეველია.