ნახეთ, როგორ გამოიყურება ყველაზე ძვირადღირებული Range Rover-ი

ყველაზე მდიდრული რეინჯ როვერი უკვე ოფიციალურად აქ არის... უნიკალურზე უნიკალური კოლაბორაციის შედეგი, რომელიც მდიდრული ავტომობილების მოყვარულებს გაოცებულს დატოვებს. ეს Overfinch Holland & Holland SUV-ია — ის იმ სამ რამეს აერთიანებს, რომელიც მდიდარ ადამიანებს ნამდვილად უყვართ — იარაღი, სასმელი და მართვა (რაღაც ბანქო, ფული და ორი ლულასავით...)

ვინც არ იცით, Overfinch კომპანიაა, რომელიც Range Rover-ებისა და Land Rover-ების უნიკალური მოდიფიკაციების შექმნითაა ცნობილი, ხოლო Holland & Holland ცეცხლსასროლი იარაღების მწარმოებელი ერთ-ერთი ყველაზე ცნობილი და მდიდრული ბრიტანული ბრენდია... 

იარაღების წარმოების ნაწილი ნუ დაგაბნევთ, Land Rover-თან კოლაბორაციაში მას 2014 წელსაც უმუშავია. მიუხედავად ამისა, ეს ორი კომპანიის ურთიერთობის ახალი თავია, რადგან საქმეში Overfinch ჩაერთო და უნიკალური ტრიო მივიღეთ. კოლაბორაციის შედეგი Range Rover L460-ის ბაზაზეა შექმნილი და რაიმე საოცარი ცვლილებები ექსტერიერს სულაც არ ეტყობა.

ავტომობილის გარე ვიზუალში მხოლოდ ორი დეტალი შეიცავალა — უკანა მხარეს დაემატა Holland & Holland-ის ბრენდინგი და ასევე, 23-დუიმიანი მსუბუქშენადნობი დისკები, რომელთაც თვითრეგულირებადი ცენტრალური ხუფი ამშვენებს — ეს ტექნოლოგიაა, რომელსაც ხშირად როლს-როისი მიმართავს, რათა დისკზე გამოსახული ავტომობილის ლოგო მუდმივად სწორ პოზიციაში იყოს. 

სიმდიდრე, ალკოჰოლი და იარაღი

რაც შეეხება ინტერიერს, ის ნამდვილად განსაკუთრებულია. სალონში არსებული გრავირებების სიმრავლე Holland & Holland-ის ძვირადღირებულ ორლულიან სანადირო თოფებს მოგვაგონებს, რაც ულამაზესია. საჭეც, ასეთი იარაღის კონდახის მსგავსად, კაკლის ხის ვინირითაა გაფორმებული.

აი, თუ საბარგულში შეიხედავთ, ამ კოლაბორაციის ნამდვილ არსსაც შეიგრძნობთ — ეს საბარგული სიმდიდრის ყველა ვითარებაში შესაგრძნობადაა დამზადებული — მართლაც, 600 000 დოლარიანი SUV-ით სანადიროდ წასვლა უნიკალური გამოცდილებაა, არა? 

საბარგულის ზედა მხარეს ორ ბოთლ ძვირადღირებულ შამპანურს, ორ ცალ ბროლის ფუჟერსა და დანა-ჩანგლის სრულ ნაკრებს იხილავთ, ხოლო თუ ქვედა უჯრაში შეიხედავთ, კიდევ უფრო გაოცებული დარჩებით, იქ ორი სანადირო თოფის შესანახი სპეციალურ სივრცეები დაგხვდებათ — აქვე ინახება ვისკის 8 ჭიქა და სანადირო ვაზნებიც. 

შესაბამისად, მანქანაში ყველაფერია, რაც ნადირობისა და პიკნიკისთვისაა საჭირო.  

Overfinch-ის CEO-მ განაცხადა, რომ ავტომობილს არაერთი მსურველი ჰყავს და, სავარაუდოდ, გაყიდვების პრობლემა ნამდვილად არ ემუქრება. ფასი, შესაძლოა, ოდნავ მაღალია, თუმცა აუდიტორია, რომლისთვისაც მანქანაა განკუთვნილი, მის გადასახდელად მზადაა.