ალვარო არბელოა და მისი ექსცენტრიული გემოვნება ავტომობილებში | Morgan 3 Wheeler
12 იანვარს, სუპერთასის ფინალში „ბარსელონასთან“ მარცხის შემდეგ, ჩაბი ალონსომ მადრიდის „რეალის“ მთავარი მწვრთნელის პოსტი დატოვა. სამეფო კლუბში მისი ადგილი „რეალის“ ყოფილმა ფეხბურთელმა, ალვარო არბელოამ დაიკავა, რომელიც მანამდე ახალგაზრდულ გუნდსაც ავარჯიშებდა. მისი წარსულიდან გამომდინარე, გასაკვირი არაა, რომ „რეალ მადრიდის“ გულშემატკივრებს კვლავ კარგად ახსოვთ ის სანახაობრივი ავტოფარეხი, რომლითაც მათი ყოფილი ფეხბურთელი თავს იწონებდა ხოლმე.
რა თქმა უნდა, არბელოას ავტოფარეხში ისეთ ძვირად ღირებულ მოდელებსაც ვიპოვით, როგორიც, მაგალითად, ბევრისთვის საყვარელი Aston Martin DB11-ია. ასევე რამდენიმე Audi-საც, რომელიც ფეხბურთელს „რეალთან“ ავტომწარმოებლის თანამშრომლობის ფარგლებში გადაეცა. თუმცა, მსგავსი ავტომობილების მიღმაც, ჩვენს ყურადღებას მაინც ეს ექსტრავაგანტური „სატრანსპორტო“ საშუალება — Morgan 3 Wheeler-ი იქცევს.
ეს ბრიტანული კონსტრუქცია თანამედროვე სპორტული მანქანების ესთეტიკას სამი ბორბლის სტილის შემოტანით არღვევს. მისი დიზაინი ავიაციის ოქროს ხანას გვაგონებს; თითქოს მხოლოდ ფრთები აკლია იმისათვის, რომ მსოფლიო ომის გამანადგურებელ თვითმფრინავს დაემსგავსოს. საინტერესოა ისიც, რომ „რეალის“ აწ უკვე მწვრთნელმა Morgan-ისთვის სწორედ გამანადგურებლების მსგავსი დიზაინი შეარჩია, მათ შორის — ლითონის თვითმფრინავის კორპუსის დეტალები.
ეს ავტომობილი, ტრადიციული მეთოდების გამოყენებით, Malvern Link-ის ქარხანაში იწარმოებოდა. ძარაში ფოლადის მილები დამუშავებული ხის შიდა სტრუქტურასთანაა გაერთიანებული. ალუმინის პანელები კი, რომლებიც მას აეროდინამიკურ ფორმას აძლევს, კონსტრუქციას ხელით ემაგრება. Morgan 3 Wheeler-ს არც კარი, სახურავი ან გვერდითა ფანჯრები აქვს, რაც მგზავრობასაც ბევრად საინტერესოს ხდის.
Morgan-ში S&S Cycle V-Twin ძრავაა მოთავსებული, რომელიც 115 ცხენის ძალას გამოიმუშავებს. ხუთსიჩქარიანი მექანიკური გადაცემათა კოლოფის საშუალებით, რომელიც Mazda MX-5-დანაა მიღებული, სიმძლავრე უკანა ბორბალზე ნაწილდება. ეს სამბორბლიანი ქმნილება 525 კილოგრამს იწონის, რაც ფორმულა 1-ის ბოლიდებზე მსუბუქად აქცევს. 0-დან 100-მდე აჩქარებას 4.5 წამი სჭირდება და მაქსიმალურ სიჩქარეს 195 კმ/სთ-ზე აღწევს.
როგორც ცნობილია, Morgan 3 Wheeler-ის თითოეული ეგზემპლარი ხელითაა აწყობილი, რასაც 100 საათზე მეტი დრო დასჭირდა. ეს ყველაფერი Morgan-ის შედარებით მაღალ ფასშიც აისახება, რომელიც 2021 წელს, წარმოების შეწყვეტის პერიოდისთვის, 50 000 ევროს შეადგენდა.
