შვარცნეგერი თავის ლეგენდარულ Hummer-ს ყიდის | მანქანა, რომელმაც ისტორია შეცვალა

1990 წელს, ფილმ „საბავშვო ბაღის პოლიციელის“ გადაღებების დროს, არნოლდ შვარცნეგერმა Humvee-ების (Hummer H1-ის სამხედრო ვერსია) სამხედრო კოლონა დაინახა და მათი ექსტერიერით მოხიბლული დარჩა. მისივე სიტყვებით, ეს იყო „ყველაზე მამაცური“ ავტომობილი, რაც კი ოდესმე უნახავს და ის იდეალურად შეესაბამებოდა მის, როგორც კინოგმირის იმიჯს.

შვარცნეგერი AM General-ს (მწარმოებელს) დაუკავშირდა, თუმცა კომპანიაში განუცხადეს, რომ ამ ავტომობილების რიგითი პირებისთვის მიყიდვას არ გეგმავდნენ. მიუხედავად ამისა, არნოლდმა არ დააყოვნა და ბრენდის ხელმძღვანელობა დაარწმუნა, რომ მსგავსი ტიპის ექსტრემალური ყველგანმავლებისთვის ფუფუნების ბაზარი არსებობდა; ის მენეჯერებთან სასაუბროდ ინდიანას ქარხანაშიც კი ჩავიდა.

მსახიობმა მათი დაყოლიება მოახერხა. მანქანა სამოქალაქო სტანდარტებთან შესაბამისობაში მოიყვანეს: დამონტაჟდა ადაპტირებული კონდიციონერი, უკეთესი სავარძლები, დამატებითი სარკეები და, რაც მთავარია, სამხედრო მანქანის 24-ვოლტიანი ელექტროსისტემა 12-ვოლტიანით შეიცვალა. ის ფაქტი, რომ შვარცნეგერი ამ მოდელით გადაადგილდებოდა, ბრენდისთვის უდიდესი რეკლამა აღმოჩნდა. მათ გამოუშვეს ავტომობილის პირველი პარტია, რომელსაც მეტსახელად „ტერმინატორი 2“ უწოდეს.

წლების შემდეგ, 2017 წელს, ამერიკელმა მსახიობმა კიდევ ერთი სურვილი აიხდინა: მან თავისი ერთ-ერთი H1 100%-ით ელექტრომოდელად გადააქცია (მას ასევე ჰყავს ელექტრო Mercedes G-Class-ი). შედეგად, ის გახდა პირველი ადამიანი, ვისაც ნულოვანი გამონაბოლქვის მქონე „ტერმინატორი 2“ ჰყავდა.

ავტომობილის ტრანსფორმაცია საკუთარ თავზე Kreisel Electric-მა აიღო. თუმცა, საქმე მარტივად ნამდვილად არ ყოფილა: რთულია Humvee, რომელიც 3.5 ტონაზე მეტს იწონის, გარდაქმნა ისეთ ტრანსპორტად, რომელსაც შეიძლება „ეკო“ ეწოდოს.

მსახიობის Hummer H1 (2000 წლის მოდელი) კაპოტის ქვეშ 6.5-ლიტრიან, V8 ტიპის დიზელის ძრავას მალავდა, რომელიც 170 ცხენის ძალასა და 393 ნიუტონ-მეტრს გამოიმუშავებდა. თუმცა ეს ძრავა წარსულს ჩაბარდა და ორი ელექტროძრავით შეიცვალა (თითოეულ ღერძზე თითო), რომლებიც ჯამურად 490 ცხენის ძალას ავითარებენ.

მანქანას 120 კმ/სთ სიჩქარის განვითარება შეუძლია. ამბობენ, რომ უზარმაზარი, 100 კვტ/სთ მოცულობის აკუმულატორის წყალობით, მისი სვლის მარაგი დაახლოებით 300 კმ-ია. თუმცა, ასეთი წონისა და აეროდინამიკის გათვალისწინებით, ის გზატკეცილზე 150 კმ-ის გავლასაც ძნელად თუ შეძლებს.

ცნობისთვის, ამ მონაცემებით, შვარცნეგერის ავტომობილს სულ რაღაც 7 500 კილომეტრი აქვს დაფარული და იდეალურად გამოიყურება. მისი ღირებულება ჯერჯერობით უცნობია, ასე რომ, დაინტერესების შემთხვევაში, მხოლოდ ლოდინი შეგიძლიათ.