თბილისიდან ონში ჩასვლა 4.5 საათში იქნება შესაძლებელი

ზემო იმერეთისა და რაჭის დამაკავშირებელი 51 კილომეტრამდე გზა საჩხერიდან იწყება და შემდეგ სოფლებზე გადის: სარეკი, ქვემოხევი, უზუნთა, შქმერი, ბოყვა, ქვაშიხიეთი, ზუდალი. აღნიშნული გზა, საბოლოოდ, ამბროლაური-ონის გზას უერთდება, რომელიც ქალაქ ამბროლაურიდან 20 კილომეტრით, ხოლო ონიდან 5 კილომეტრითაა დაშორებული.

ახალი გზის დიდი ნაწილი, ფაქტობრივად, დაუსახლებელ ტყიან ზონაში, მდინარე ხეორის ხეობაში გადის და ზღვის დონიდან 1 000 – 1 500 მეტრის სიმაღლეზე მდებარეობს.

საჩხერე-ონის მარშრუტის სამგზავრო დრო — სიგრძე 111 კილომეტრი — დაახლოებით 6 საათს შეადგენდა. თუმცა ახალი გზით მგზავრობის დრო მნიშვნელოვნად შემცირდება. კერძოდ, ზემო იმერეთი-რაჭის ახალი საავტომობილო გზით მგზავრობის დრო სულ მცირე ერთი საათით შემცირდა. თბილისიდან ონამდე მარშრუტის სამგზავრო დრო კი საათ-ნახევრით შემცირდა. შედეგად, თუ ამ გზის გავლას წარსულში 6 საათი სჭირდებოდა, ახლა მგზავრები ონში ჩასვლას მხოლოდ 4.5 საათში შეძლებენ.

გარდა ამისა, საჩხერე-უზუნთა-შქმერი-ზუდალის გზის სამ სხვადასხვა მონაკვეთზე სტიქიით დაზიანებული მიწის აღდგენის სამუშაოებიც მიმდინარეობს. დაზიანებულ მონაკვეთებზე ზედა საყრდენი რკინაბეტონის კედლები და ზედა საყრდენი ბეტონის ბლოკების კედლები მოეწყობა. ასევე, საავტომობილო გზის დაზიანებულ ნაწილებში იგეგმება ასფალტბეტონის საფარის მოწყობაც.

დამატებით, სამუშაოები მიმდინარეობს შიდასახელმწიფოებრივი მნიშვნელობის ქუთაისი-ჭომა-ალპანა-მამისონის უღელტეხილის საავტომობილო გზის 107-ე კილომეტრისა და საჩხერე-რაჭის დამაკავშირებელი საავტომობილო გზის მიერთების გაუმჯობესების მიზნით. სარეაბილიტაციო სამუშაოების ფარგლებში მდინარე რიონზე ახალი ხიდისა და მისასვლელი გზების მშენებლობებიც იგეგმება.

არსებული პროექტით, ახალი ხიდი ორმალიანი და 76.2-მეტრიანი იქნება და საჩხერე-რაჭის დამაკავშირებელ ახალ, 51-კილომეტრიან გზას ქუთაისი-ჭომა-ალპანა-მამისონის გზასთან დააკავშირებს. ქუთაისი-ჭომა-ალპანა-მამისონის გზის საშუალებით კი ლეჩხუმსა და ქვემო სვანეთში მოხვედრაა შესაძლებელი.