Vigilante-ს ახალი მონსტრი | 1979 წლის Jeep Cherokee Viper-ის V10 ძრავით

საავტომობილო სამყაროში ტუნერები ორ უკიდურესობას შორის ბალანსირებენ: მცირე ბიუჯეტით აწყობილი პროექტი ყოველთვის ნახევარფაბრიკატის შთაბეჭდილებას ტოვებს, ხოლო გადამეტებული ფინანსებითა და ფანტაზიით შექმნილი მანქანა ხშირად საკუთარი თავის პაროდიად იქცევა ხოლმე, რომელიც პარკინგზე მდგომი ყვირილით ითხოვს ყურადღებას.

1979 წლის ეს Jeep Cherokee Chief-ი ზუსტად ამ ორ შეცდომას შორის არსებულ ვიწრო, იდეალურ სივრცეში მოთავსდა — Aston Martin-ის საღებავით, 6-სიჩქარიანი მექანიკური გადაცემათა კოლოფით, ნამდვილი 4x4 სისტემითა და 9.0-ლიტრიანი Viper V10 ძრავით. ერთი შეხედვით, პარკინგზე ვერაფრით მიხვდებით, რა გიჟური სუპერქარის ძალა იმალება ამ კლასიკის კაპოტქვეშ.

ავტომობილი ამჟამად Bring a Trailer-ის აუქციონზე იყიდება. ეს Cherokee Chief ტეხასურმა ატელიემ, Vigilante-მ ააწყო, რომელიც ცნობილია კლასიკური ჯიპების თანამედროვე მონსტრებად გადაკეთებით ისე, რომ მათ ავთენტურ ხასიათს საერთოდ არ უკარგავს. პირველი შეხედვით, ეს არის უბრალოდ იდეალურად რესტავრირებული, სუფთა მანქანა. ორფეროვანი თეთრი და ლურჯი შეფერილობა, 1975 წლის სტილის საფირმო გვერდითა გრაფიკა და მასიური BFGoodrich-ის საბურავები სრულყოფილად ერწყმის 70-იანი წლების მიწურულის Cherokee-ს ხასიათს.

კაპოტის ქვეშ ბინადრობს კომპანია Prefix-ის მიერ აწყობილი, ატმოსფერული, 9.0-ლიტრიანი Viper Gen V V10 ძრავი, რომელიც 825 ცხენის ძალასა და 1017 ნიუტონ-მეტრ მაბრუნ მომენტს გამომუშავებს. ეს ციფრები ამ ვინტაჟურ ჯიპს პირდაპირ თანამედროვე სუპერქარების ტერიტორიაზე ამწესებს.

ინტერიერში Vigilante-მ სრულიად განსხვავებული და გენიალური გზა აირჩია. იმის ნაცვლად, რომ სალონი თანამედროვე მდიდრულ SUV-ის სტილში გადაეწყვიტათ, მათ პატივი მიაგეს Jeep-ისა და AMC-ის ისტორიულ მემკვიდრეობას და სავარძლები ლურჯი Levi’s-ის ჯინსის ქსოვილით შემოსეს. ვინტაჟურ მასალებთან ერთად სალონში შეხვდებით ყველა თანამედროვე კომფორტს: კონდიციონერს, Bluetooth სისტემას, ელექტრო შუშებს, პრემიუმ აუდიოსისტემასა და ძალზედ სერიოზულ ხმის იზოლაციას.

ფასი აუქციონზე უკვე ექვსნიშნა ციფრს უახლოვდება, დასრულებამდე კი კიდევ რამდენიმე დღეა დარჩენილი. ეს გასაკვირი სულაც არ არის.