ფარლი ბედნიერია | Ford-ის წარმოების ხარისხის გაუმჯობესება კვლევამ დაადასტურა
ფორდის გენერალური დირექტორი ჯიმ ფარლი კომპანიის უმნიშვნელოვანეს გამარჯვებას ზეიმობს — ავტორიტეტული სააგენტო JD Power-ის ავტომობილების ხარისხის ბოლო კვლევაში, ფორდი დიდ ბრენდებს შორის პირველ ადგილზე გავიდა. ფარლის განცხადებით, ეს წარმატება იმ ოთხწლიანი ინტენსიური კამპანიის შედეგია, რომელიც კომპანიაში არსებული ხარვეზების გამოსასწორებლად ჩატარდა.
ასევე იხილეთ: როგორ შექმნა ღარიბმა ფერმერმა ბიჭმა „ფორდის“ იმპერია?
აღნიშნული კვლევა აანალიზებს იმ პრობლემებს, რომლებსაც ახალი ავტომობილის მფლობელები ფლობის პირველი 90 დღის განმავლობაში აწყდებიან. მონაცემების მიხედვით, ფორდმა ყოველ 100 ავტომობილზე საშუალოდ 152 ხარვეზი დააფიქსირა. ეს მაჩვენებელი საკმარისი აღმოჩნდა იმისთვის, რომ ბრენდს ისეთი გიგანტებისთვის გაესწრო, როგორებიცაა Lexus, Nissan, Buick, Hyundai და Subaru.
ეს არის უდიდესი წინსვლა 2023 წელთან შედარებით, როდესაც ფორდი მასობრივ ბრენდებს შორის მხოლოდ მე-15 ადგილს იკავებდა. ჯიმ ფარლიმ აღნიშნა, რომ კომპანიამ სრულად შეცვალა ქარხნების მუშაობის პრინციპი და ხარისხის კონტროლის ოპერაციული სისტემა.
მიუხედავად იმისა, რომ კვლევა მხოლოდ ფლობის საწყის ეტაპს ასახავს და ფორდს მიმდინარე წელს 51 ოფიციალური გაწვევა უფიქსირდება — რაც ორჯერ მეტია ნებისმიერ კონკურენტზე — ფარლი ოპტიმისტურადაა განწყობილი. მისი თქმით, საგარანტიო და გაწვევის ხარჯები მკვეთრად მცირდება, რაც კომპანიისთვის ფინანსურადაც დიდ წინსვლას ნიშნავს.
დღეს ფორდის თანამშრომლები სრულად არიან ფოკუსირებული მონაცემების ანალიზზე, რათა თითოეული დეფექტის მიზეზი დეტალურად შეისწავლონ. ხარისხის გაუმჯობესების პარალელურად, ფორდი უფრო ხელმისაწვდომი მოდელების გამოშვებასაც გეგმავს — ბაზარზე ხუთი ან ექვსი ასეთი ავტომობილი გამოვა, რომელთაგან პირველი ახალი ელექტრო პიკაპი იქნება და ის 30 000 დოლარზე ნაკლები ეღირება. ფარლიმ ისიც გაამჟღავნა, რომ კალიფორნიაში შექმნილი საიდუმლო საინჟინრო გუნდის მუშაობის წყალობით, ფორდს ელემენტების თვითღირებულებაში ჩინური BYD-ისთვის კონკურენციის გაწევაც კი შეუძლია.
