Hemi-ს სიმძლავრე იაფად | Dodge Durango რეკორდულ გაყიდვებს აფიქსირებს
Dodge Durango-ს საწარმოო ხაზში ლეგენდარული 392 Hemi დაბრუნდა, თუმცა ამჯერად სრულიად ახალი კონცეფციით. ნაცვლად იმისა, რომ 6.4-ლიტრიანი V8 ძრავა ძვირადღირებული SRT სერიის მიღმა დაემალათ, Dodge-მა ის ბევრად უფრო ხელმისაწვდომ, მაღალი წარმადობის ვარიანტად აქცია.
ასევე იხილეთ: რატომ ეშინოდა ჰენრი ფორდს ძმები დოჯების? - დოჯის ისტორია
დიახ, 475-ცხენისძალიანი აგრეგატი ახალი, 2026 წლის Durango R/T 392-ის სტანდარტულ ძრავად იქცა. მოდელი გაყიდვაში მარტში გამოვიდა, მისი საწყისი ფასი სულ რაღაც $49 995-ია და მომხმარებლისთვის ავტომობილების მიწოდება უკვე აქტიურად მიმდინარეობს. სწორედ ამ ხელმისაწვდომმა სიმძლავრემ შეაძლებინა Dodge-ის სამრიგიან, საშუალო ზომის SUV-ს გაყიდვების ახალი რეკორდი დამყარებინა.
Durango-ზე მოთხოვნა არასდროს ყოფილა ასეთი მაღალი, მიუხედავად იმისა, რომ ის ბაზარზე ყველაზე „ხანდაზმული“ SUV-ია. ეს ტემპი, სავარაუდოდ, 2027 წელსაც შენარჩუნდება — Dodge-მა უკვე გააჟღერა 2027 წლის Durango-ს ხაზის დეტალები, სადაც R/T 392 კვლავ რჩება.
როგორც ჩანს, ელექტრიფიკაციის დროებით გვერდზე გადადებამ და მოდელების უმრავლესობაში ხელმისაწვდომი სიმძლავრის შენარჩუნებამ Durango-ს შოურუმებში საოცარი წარმატება მოუტანა. Stellantis-ის ამერიკულმა ბრენდმა 2026 წლის პირველ ნახევარში 38 575 ავტომობილი გაყიდა, რაც წინა წელთან შედარებით 12.1%-იან ზრდას ნიშნავს და პირველი კვარტლის აბსოლუტური რეკორდია. ეს Durango-ს საუკეთესო მაჩვენებელია 2006 წლის შემდეგ — შესაბამისად, ამ თაობისთვის 16-წლიანი არსებობის მანძილზე საუკეთესო სტარტია. ეს სტრატეგია წარმატებით ამართლებს არამხოლოდ Durango-ს, არამედ Stellantis-ის სხვა მოდელების შემთხვევაშიც.
2026 წლის Durango R/T 392 ორი კომპლექტაციით არის ხელმისაწვდომი: Launch Edition-ი და უფრო მდიდრულად აღჭურვილი Premium Launch Edition-ი. ორივე ფასი შთამბეჭდავია, თუ გავითვალისწინებთ, რომ ბოლოს 392 Hemi Durango-ში 2024 წელს გვხვდებოდა — მაშინ ის ექსკლუზიურად Durango SRT 392-ს ეკუთვნოდა და მისი ფასი $74 995-დან იწყებოდა. მარტივად რომ ვთქვათ, ეს ძრავა Durango-ში ასეთი იაფი არასდროს ყოფილა.
ორივე ვერსიაში თქვენ იღებთ 475 ცხენის ძალასა და 637 ნმ მაბრუნ მომენტს, რაც საკმარისია იმისთვის, რომ ეს გოლიათი 0-დან 100 კმ/სთ-მდე სულ რაღაც 4.4 წამში აჩქარდეს. ამას ემატება 3946 კგ-მდე ბუქსირების შესაძლებლობა და V8-ის ერთ-ერთი საუკეთესო, აგრესიული ხმა, რაც კი დღეს ბაზარზე შეგიძლიათ იპოვოთ.
