Tesla Model S Plaid-მა McLaren-ის სუპერქარი დრაგ-რბოლაში უბრალოდ გააქრო
ლას-ვეგასის ავტოდრომზე დრაგ-რბოლაში ერთმანეთს ორი სრულიად განსხვავებული სამყარო შეეჯახა: 1020-ცხენისძალიანი ელექტრო სედანი Tesla Model S Plaid-ი და ბრიტანული ჰიბრიდული სუპერქარი McLaren Artura. შედეგმა მაყურებელი კიდევ ერთხელ გააოცა — Tesla-ს სტარტი იმდენად სწრაფი და დაუნდობელი აღმოჩნდა, რომ სუპერქარი ძალიან უსუსური გამოჩნდა.
McLaren Artura თავისთავად ნელი ავტომობილი ნამდვილად არ არის. ის აღჭურვილია 3.0-ლიტრიანი Twin-Turbo V6 ძრავითა და ელექტროძრავით, რომლებიც ჯამურად 671 ცხენის ძალას გამომუშავებენ. მსუბუქი კონსტრუქციისა და აეროდინამიკის წყალობით Artura ნამდვილი სუპერქარია, თუმცა დრაგის სტარტზე მას შანსიც კი არ ჰქონია. Tesla Model S Plaid-ი კი სრულად ამძრავია და აღჭურვილია 3 ელექტროძრავით, რომლებიც 1020 ცხ.ძ-ს გამოიმუშავებენ.
Tesla ve McLaren, kısa mesafe kalkış yarışı yaptı: https://t.co/FuLvxTPfgi
— Bulvar Medya (@Bulvarpress) September 12, 2026
შესაბამისად, უჩვეულო არ არის ის, რომ მწვანე შუქის ანთებისთანავე Tesla ოთხივე თვლით ადგილს ისეთი ძალით მოსწყდა, რომ McLaren-ს მყისიერად რამდენიმე კორპუსით გაასწრო. ელექტროძრავების მომენტალურმა აჩქარებამ 5-ადგილიან საოჯახო სედანს საშუალება მისცა, სუპერქარი ფინიშის ხაზამდე უშანსოდ დაეტოვებინა. Tesla Plaid-მა 1/4 მილი (402 მეტრი) 9.3-9.4 წამში დაფარა, რაც მასობრივი წარმოების სედანისთვის წარმოუდგენელი მაჩვენებელია.
სოციალურ ქსელებში გავრცელებულ ვიდეოს დიდი გამოხმაურება მოჰყვა. გულშემატკივრები აღნიშნავდნენ, რომ Tesla-ს სტარტი იმდენად უპრობლემო და სწრაფი იყო, რომ სუპერქართან შედარებით ხუმრობას წააგავდა. მიუხედავად იმისა, რომ McLaren Artura ტრასაზე და მოსახვევებში მართვადობით გაცილებით დახვეწილი ავტომობილია, პირდაპირ ხაზზე სწორხაზოვანი აჩქარების მეფედ კვლავ Tesla Model S Plaid-ი რჩება.
