დეტროიტის „დიდი სამეული“ აშშ-ის ლიდერის ინიციატივას უპირისპირდება
ამერიკული ავტოინდუსტრიის გიგანტები — General Motors-ი, Ford-ი და Stellantis-ი — ღიად ეწინააღმდეგებიან აშშ-ის ლიდერის განცხადებას იმის შესახებ, რომ ის მიესალმება აშშ-ის ტერიტორიაზე ჩინური ავტომწარმოებლების მიერ ქარხნების გახსნას, თუკი ისინი ამერიკელებს დასაქმებენ.
ასევე იხილეთ: როგორ შექმნა ღარიბმა ფერმერმა ბიჭმა „ფორდის“ იმპერია?
თავად ავტომწარმოებლებს ინდივიდუალური კომენტარი არ გაუკეთებიათ, თუმცა მათმა ინტერესების დამცველმა ორგანიზაციამ, ამერიკის საავტომობილო პოლიტიკის საბჭომ (AAPC), ვაშინგტონში მკაფიო გაფრთხილება გაავრცელა. საბჭოს თავმჯდომარემ აღნიშნა, რომ გაჟღერებული შედარება იაპონურ ბრენდებთან არაკორექტულია, რადგან ჩინური კომპანიები სარგებლობენ სახელმწიფო სუბსიდიებითა და არასაბაზრო უპირატესობებით, რაც ამერიკულ ბაზარზე უთანასწორო კონკურენციას შექმნის.
ეს სიტუაცია საკმაოდ უხერხულ პოზიციაში აყენებს დეტროიტის გიგანტებს, რომლებიც აქამდე მხარს უჭერდნენ ადმინისტრაციის პროტექციონისტულ პოლიტიკას. პარალელურად, სიტუაციას ართულებს ისიც, რომ აშშ-ის ტრანსპორტის დეპარტამენტმა ცოტა ხნის წინ გააკრიტიკა Ford-ი ჩინურ კომპანიებთან (CATL და Geely) პარტნიორობის გამო, მაშინ როცა ლიდერი ახლა თავად აცხადებს მზაობას, ჩინურ გიგანტებს ამერიკის მიწაზე ქარხნების გახსნის უფლება მისცეს.
ჩინური ავტოგიგანტების საფრთხე არ არის ჰიპოთეტური — ჩინური ბრენდები უკვე აკონტროლებენ მექსიკის ახალი ავტომობილების ბაზრის დაახლოებით 20%-ს, ხოლო ექსპერტების პროგნოზით, 2030 წლისთვის მათმა წილმა გლობალურ ბაზარზე შესაძლოა 30%-ს მიაღწიოს. Ford-ის გენერალურმა დირექტორმა ჯიმ ფარლიმ არაერთხელ აღნიშნა, რომ ჩინური ელექტრომობილები უმაღლესი ხარისხითა და ციფრული ტექნოლოგიებით გამოირჩევიან.
დეტროიტის ავტომწარმოებლების პოზიცია მარტივია: აშშ-ის ტერიტორიაზე ჩინური ავტომობილების აწყობა ვერ გააუქმებს იმ უზარმაზარ ფინანსურ და სტრატეგიულ უპირატესობებს, რაც ამ ბრენდებს საკუთარი სახელმწიფოსგან აქვთ. შესაბამისად, მთავარი ბრძოლა არა წარმოების ადგილმდებარეობაზე, არამედ თანაბარი კონკურენციის პირობების შენარჩუნებაზე მიმდინარეობს.
