ხანგრძლივი პაუზის შემდეგ, Alfa Romeo ახალ სუპერქარს აანონსებს

Alfa Romeo-ს მოდელები, თავიანთი ცნობილი იტალიური „კაპრიზების“ მიუხედავად, ყოველთვის გამორჩეული ემოციურობით ხასიათდებოდნენ. თუმცა, ბოლო პერიოდის ავტომობილებს ნამდვილი აზარტი და ვნება აშკარად აკლიათ. Giulia და Stelvio დღემდე შესანიშნავად გამოიყურებიან, თუმცა ისინი უკვე ათ წელზე მეტს ითვლიან, ხოლო Tonale-მ და Junior-მა ავტომოყვარულების აღფრთოვანება ვერ შეძლეს. შედეგად, მიმდინარე წელს ბრენდის გლობალური გაყიდვები მნიშვნელოვნად შემცირდა.

ცხადია, ამან ახალი ფლაგმანური მოდელის საჭიროება შექმნა, რომელმაც ბრენდის საწარმოო ხაზში საპატიო ადგილი უნდა დაიკავოს და Alfa Romeo-სადმი ინტერესი ხელახლა გააღვივოს. გასულ კვირას იტალიურმა ავტომწარმოებელმა ახალი კონცეპტი დააანონსა, რომლის დებიუტიც ოქტომბერში, პარიზის ავტოსალონზე შედგება. ახლახან გავრცელებული მორიგი თიზერი კი უკვე გარკვეულ წარმოდგენას გვიქმნის იმის შესახებ, თუ რას უნდა ველოდოთ.

ვიდეო აქცენტს ავტომობილის სახელწოდებაზე აკეთებს. ეკრანზე ინგლისური და იტალიური სიტყვებისა და ფრაზების სწრაფი მონაცვლეობა მიანიშნებს, რომ მოდელის სახელი სწორედ მათ შორის არის დამალული. ეკრანზე გამოჩენილ სიტყვებს შორის ვხვდებით: Italia, Visceral, DNA, Future, Battito Rosso, Battito Veloce, Leonardo და Cuore Sportivo.

თუმცა, შესაძლო სახელზე მეტად საინტერესო ის კადრია, რომელიც, სავარაუდოდ, ახალ ავტომობილს გვიჩვენებს. ვიდეოში ჩანს, თუ როგორ მოძრაობენ სარბოლო ტრასაზე Junior-ი, Giulia, Stelvio და Tonale, რის შემდეგაც ეკრანზე დაბალი, აეროდინამიკური კუპეს სილუეტი გამოჩნდება. შესაძლოა ეს ექსკლუზიური, შეზღუდული რაოდენობით გამოშვებული 33 Stradale იყოს, ან სულაც სრულიად ახალი კონცეპტი. ნებისმიერ შემთხვევაში, ის ძალიან დახვეწილად და ელეგანტურად გამოიყურება, რაც მიანიშნებს, რომ იტალიური ბრენდი რაღაც მართლაც ამაღელვებელზე მუშაობს.

არ არის გამორიცხული, რომ ეს კონცეპტი წარმოადგენდეს ახალ მოდელს Bottegafuoriserie სუბ-ბრენდიდან, რომელიც Stellantis-მა Maserati-სა და Alfa Romeo-სთვის გასული წლის ბოლოს შექმნა (თუმცა ინფორმაცია ჯერ ოფიციალურად დადასტურებული არ არის). ახალი ქვე-ბრენდი სრულად Alfa Romeo-სა და Maserati-ს ექსკლუზიური მოდელების წარმოებაზე იქნება ორიენტირებული.