ჩინური BMW მესამე სერია | უფრო მძლავრი, ვიდრე ევროპული და ამერიკული ვერსიები

ჩინეთის ბაზრისთვის განკუთვნილი მესამე სერია BMW-სა და Brilliance-ის ერთობლივ ქარხანაში იწარმოება. ვიზუალურად ის დასავლეთის ბაზრებზე გაყიდული მოდელებისგან დიდად არ განსხვავდება.

ავტომობილი დიზაინის იმავე ენას იყენებს, რომელიც პირველად ელექტრო BMW i3-ში ვიხილეთ. თუმცა ბენზინის ძრავის მქონე მესამე სერია განახლებული CLAR-პლატფორმის საფუძველზე შეიქმნა. ეს ის არქიტექტურაა, რომელიც წინა თაობის მოდელშიც ვიხილეთ. ელექტრომობილისგან განსხვავებით, ის Neue Klasse პლატფორმას არ ეფუძნება.

ჩინეთის ბაზრისთვის განკუთვნილ iX3-ს, i3-სა და 3 Series-ს ასევე უფრო ტრადიციული კარის სახელურები აქვს. ამის მიზეზი უსაფრთხოების ახალი რეგულაციებია. ეს უკანასკნელი ავტომობილის ძარაში დაყენებულ სახელურებს კრძალავს.

BMW-Brilliance ახალ სედანს ორ ვერსიად შემოგვთავაზებს: 325L და 330L. სახელწოდებაში L იქნებოდა დამატებული, რაც დაგრძელებულ ძარაზე მიუთითებს. ორივე მოდელი 2-ლიტრიანი ტურბო 4-ცილინდრიანი ძრავით იქნება აღჭურვილი. საბაზისო 325L-ის სიმძლავრე 234 ცხ.ძ-ს შეადგენს, მაქსიმალური სიჩქარე კი 233 კმ/სთ-ია. 330L-ის ვერსია უფრო მძლავრი ძრავით იქნება ხელმისაწვდომი — 287 ცხენის ძალით და 250 კმ/სთ-ის მაქსიმალური სიჩქარით.

ორივე შემთხვევაში ჩინური მესამე სერიის BMW უფრო მძლავრია, ვიდრე ევროპასა და აშშ-ში გაყიდული შესაბამისი ვერსიები.

ჩინეთის ფარგლებს გარეთ BMW-ის მესამე სერიის მსურველებს M350 xDrive-ის არჩევაც შეუძლიათ. ეს ვერსია 3-ლიტრიანი ერთრიგა 6-ცილინდრიანი ძრავითაა აღჭურვილი და მისი სიმძლავრე 443 ცხენის ძალას შეადგენს. თუმცა ჩინური მხარის განცხადებაში M350 xDrive ნახსენები არაა და ის, შესაძლოა, ბაზარზე საერთოდაც არ გამოჩნდეს. ამის მიზეზი ჩინეთის მკაცრი საგადასახადო წესებია, რომლებიც დიდი მოცულობის ძრავებს დამატებითი გადასახადით ბეგრავს.