Tesla-მ ახალი Model Y წარადგინა | შეძლებს კროსოვერი კომპანიის გაყიდვების გადარჩენას?
ელექტრომობილების ამერიკულმა მწარმოებელმა, Tesla-მ, Model 3 Performance-ის შედარებით კომპაქტური კროსოვერი, Model Y Performance ოფიციალურად წარადგინა. გუშინ, კომპანიამ პლატფორმა X-ზე „სპოილერიც“ გამოაქვეყნა, რომლითაც მომხმარებელს ახალი მოდელის დებიუტის შესახებ აცნობა. დღეს კი, Model Y-იც გამოჩნდა.
მთავარი კითხვები ამ ავტომობილის შესაძლებლობებსა და ერთი დამუხტვით, დაფარვის დიაპაზონთან დაკავშირებით რჩებოდა. როგორც ნავარაუდები იყო, Model 3 Performance-ის მსგავსად, კროსოვერს, განახლებული ორძრავიანი სისტემა აქვს, თუმცა ის შედარებით ნაკლებს, 460 ცხენისძალას გამოიმუშავებს. ახალი მოდელი 0-დან 100-მდე 3.3 წამში ჩქარდება და 2 033 კილოგრამს იწონის. მაქსიმალურ სიჩქარეს ელექტრომობილი 250 კმ/სთ-ზე გამოიმუშავებს.
თუმცა Tesla-ს აკუმულატორის მოცულობის შესახებ ინფორმაცია არ გაუსაჯაროებია. მათი თქმით, Model Y Performance უფრო მაღალი სიმკვრივის უჯრედებს იყენებს. WLTP-ის თანახმად კი, ერთი სრული დამუხტვით დაფარვის დიაპაზონი 580 კილომეტრს აღწევს, რაც Long Range AWD-ზე მხოლოდ 6 კილომეტრით ნაკლებია. Supercharger-ით 15-წუთიანი დამუხტვა საკმარისია იმისათვის, რომ ავტომობილმა 243 კილომეტრამდე მანძილი გაიაროს.
2026 წლის Model Y Performance-ს სედანისგან ადაპტიური ამორტიზატორები აქვს მიღებული, თუმცა ისინი, SUV-ის შედარებით დიდ ზომებსაა მორგებული. ამას დამატებული 21-ინჩიანი ალუმინის ნაჭედი დისკები, რომლებსაც როგორც ნავარაუდები იყო წითელი სამუხრუჭე კალიპერები ემატება. ექსტერიერის ცვლილებები მოიცავს კარბონის უკანა სპოილერს, რომელიც მხოლოდ ვიზუალური არაა. როგორც ჩანს, ისინი მიმჭერი ძალის გაზრდითა და წინაღობის შემცირებით აეროდინამიკას აუმჯობესებენ.
სალონში კი მფლობელებს უფრო მაღალი გარჩევადობისა და მკვეთრი გრაფიკის მქონე 16-ინჩიანი ეკრანი დახვდებათ. წინა მხარეს, გათბობადი და ვენტილირებადი სავარძლები, გასაშლელი ბარძაყის საყრდენით, ხოლო უკან - ასევე გათბობადი სავარძლები. რომელთაც ელექტრო დახრის შესაძლებლობა აქვთ.
გერმანიაში, სადაც ევროპისთვის განკუთვნილი მოდელები იწარმოება, 2026 წლის Model Y Performance-ის ფასი 61 990 ევროდან იწყება. ეს დაახლოებით 9 000 ევროთი მეტია Long Range AWD-ზე. მიწოდება სექტემბერში დაიწყება.
