მტვერსასრუტების ჩინურ მწარმოებელს ყველაზე სწრაფი სუპერქარის შექმნა სურს

ბოლო წლებში ჩინური ავტომწარმოებელები ბაზარზე აქტიურად გამოჩნდნენ და ძირითადად ელექტრომობილებით, არაერთი დასავლული წარმოების მოდელი უკან ჩამოიტოვეს. ამას მოწმობს მათი შედეგები და ამასთან ერთად ამბიცია, განვითარდნენ და საავტომობილო ბაზრის მნიშვნელოვანი წილიც დაიკავონ.

თუ წარსულში, საავტომობილო ბაზარზე სმარტფონების ჩინურ მწარმოებელთა გამოჩენა გვიკვირდა, თუნდაც Xiaomi-ის სახით, ახლა სჯობს ახალი სენსაციისთვისაც მოვემზადოთ. ამჯერად, ინდუსტრიაში თავის დამკვიდრება Dreame Technology-მ განიზრახა - კომპანიამ, რომელიც ძირითადად მტვერსასრუტების წარმოებითაა ცნობილი. თანაც, ფირმის გეგმები ბევრად ამბიციურია: მას ყველაზე სწრაფი სუპერქარის შექმნა სურს.

Dreame Technology საკუთარ თავს „ჩინეთის ვაშლს“ უწოდებს. კომპანიის ვებგვერდის თანხმად, Dreame-ის ამჟამინდელი პროდუქციის ხაზი მოიცავს უსადენო და რობოტ მტვერსასრუტებს, ჰაერის გამწმენდებს, თმის საშრობებს, გაზონის სათიბებს და აუზის საწმენდებს. კომპანია 2017 წელს დაარსდა და მას შემდეგ, აშშ-სა და სხვა საერთაშორისო ბაზრებზე ფართოვდება.

„ძვირფასო კოლეგებო, დღეს Dreame ოფიციალურად წარადგენს მსოფლიოში ყველაზე სწრაფი მანქანის შექმნის გეგმას. ეს არ იყო მარტივი გადაწყვეტილება და არც უბრალო ახირებაა. ეს არა რისკი, არამედ გამოცდაა. გამოცდაა წარსულში დაგროვილი ცოდნის, ტექნოლოგიური კვლევებისა და განვითარების, ორგანიზაციული კულტურისა და გლობალური ოპერაციების. ჩვენ ამისთვის სტრატეგიულად უკვე მზად ვართ.

თუმცა, ჩვენ ასევე გვჯერა, რომ რეალური ბარიერი არა კაპიტალი, არამედ „სწორი პროდუქტების“ წარმოების უნარია. ჩვენ არც ერთ ცენტს არ გავფლანგავთ. შეიძლება პირველები არ ვიყოთ, მაგრამ ყველაზე მონდომებულები ვიქნებით. რადგან უშიშრები ვართ, ვბედავთ მოქმედებას; რადგან მტკიცედ გვჯერა, რომ მივაღწევთ. ახლა კი, დავიწყოთ!“, - წერია კომპანიის მიერ თანამშრომლებისთვის გაგზავნილ წერილში.

ჩინურ სოციალურ მედიაში გამოქვეყნებულ პოსტში Dreame-მ საავტომობილო სამყაროში შესვლის შესახებ გეგმები წარადგინა. თუმცა Xiaomi-სა და Huawei-ს მსგავსი კონკურენტებისგან განსხვავებით, მთავარ მიმართულებად მან ჰიპერმანქანები და სიჩქარის რეკორდების დამყარება დაისახა. გამოდის, რომ მტვერსასრუტების მწარმოებელი არც მეტი არც ნაკლები Bugatti-თან და Koenigsegg-თან კონკურენციისთვის ემზადება.

განცხადების თანახმად, Dreame მუშაობას „ნულიდან“ არ იწყებს. ამის ნაცვლად, კომპანია ჩინეთის განვითარებული ელექტრომობილების მიწოდების ჯაჭვისა და წარმოების ეკოსისტემის გამოყენებას გეგმავს. კომპანია ასევე უკვე არსებულ მომწოდებლებთან ან ავტომწარმოებლებთან პოტენციურ თანამშრომლობაზეც მიუთითებს, რამაც სანდოობა Dreame-ის გეგმების მიმართ შესაძლოა კიდევ უფრო გაზარდოს.