VW-ის ბენზინზე მომუშავე უკანასკნელი Golf R-ი Audi-ის 5-ცილინდრიან მონსტრს მალავს?

Volkswagen-ს თავისი აუდიტორიის გულის მოგება ყოველთვის გამოსდიოდა. ათწლეულების განმავლობაში ავტობუსის დაბრუნების შესახებ გავრცელებული ხმების შემდეგ, საბოლოოდ ID.Buzz-ი მივიღეთ. მიუხედავად იმისა, რომ ID.Buzz-ი ის სულაც არ ყოფილა, რასაც ყველა ელოდა, მაინც, მომხმარებელმა დაინახა, რომ VW-მა მათი სურვილები გაითვალისწინა. 

ახლა კი შესაძლოა ის ცხელი ჰეტჩბეკიც ვიხილოთ, რომელსაც VW-ის ერთგული მძღოლები ამდენი წელია ელოდებიან. თუ გავრცელებულ ხმებს დავუჯერებთ, Golf R-ში კომპანია Audi-ის ლეგენდარულ 2.5-ლიტრიან, 5-ცილინდრიან ტურბოძრავას ჩადგამს, რომელიც წარსულში RS3-ში გვინახავს და თითქმის ყველა ავტოენთუზიასტს უყვარს.

ცეცხლის სიმძლავრეს კი, Golf R-ის 25 წლის იუბილეზე უნდა ველოდოთ. 2014 წელს, R 400 კონცეფცია იყო პირველი მინიშნება იმისა, რომ რამე მსგავსი, წლების შემდეგ მაინც გამოვიდოდა. VW-მ მაშინ განაცხადა, რომ საწარმოო ვერსია მუშაობის პროცესში იყო, თუმცა რეალურად ის არასდროს გამოუჩენია. ეს არ იყო პირველი შემთხვევა, როდესაც ავტომწარმოებელმა პირობა დაარღვია და ალბათ არც უკანასკნელი იქნება.

თუმცა Golf R-ის 25 წლის იუბილეზე წესით RS3-ის 5-ცილინდრიან მონსტრს მივიღებთ. ნაცნობი 2-ლიტრიანი ოთხცილინდრიანი ძრავის ნაცვლად, ეს სპეციალური გამოშვება, როგორც ამბობენ RS3-ის 2.5-ლიტრიანი ხუთცილინდრიანი ტურბოძრავით აღიჭურვება, რომელიც ამჟამინდელი სახით თითქმის 400 ცხენის ძალას და 480 ნიუტონ მეტრს გამოიმუშავებს.

თუ ის Golf-ის ძრავის განყოფილებაში ყოველგვარი მოდიფიკაციის გარეშე მოხვდება, ეს მასშტაბური განახლება იქნება 328-ცხენისძალიანი Golf R-თან შედარებით, რომელიც ამჟამად გაყიდვაშია. კომპანია კი, საბოლოოდ R 400-ზე ათწლეულის დაპირებასაც შეასრულებს.

Audi ახლა ძრავის რეკონსტრუქციაზე მუშაობს, რათა ის ევროპის კავშირის გამონაბოლქვის მკაცრ რეგულაციებს შეესაბამებოდეს. გარდა ამისა, Volkswagen-ს წესით, ძარის გაძლიერებაც მოუწევს, ამ ტიპის სიმძლავრესთან  გასამკლავებლად. Autocar-ის ცნობით, RS3-ით აღჭურვილი Golf R, რომელიც წესით, ამ მოდელის უკანასკნელი ბენზინზე მომუშავე ვერსია იქნება, 2027 წელს გამოვა.