იუთუბერმა ჩინური ელექტრომობილით მთელი სახლი 24-საათით გაანათა

შეუძლია თუ არა თანამედროვე ელექტრომობილს ჩვეულებრივი სახლის ელექტროენერგიით სრულად უზრუნველყოფა ისე, რომ ყოველდღიურ კომფორტსა და ჩვეულ რუტინაზე უარის თქმა არ მოგიწიოთ? სწორედ ამის შემოწმება გადაწყვიტა პოპულარული იუთუბ-არხის, Efficient Alex-ის ავტორმა, როდესაც ჩინური კომპაქტური ელექტრო-SUV-ის, Leapmotor B10-ის V2L ტექნოლოგია რეალურ პირობებში გამოცადა.

ასევე იხილეთ: როგორ იგებს ჩინეთი ელექტრომობილების ომს?

ექსპერიმენტის იდეა მარტივი, თუმცა ამბიციური იყო: იუთუბერმა სახლში ცენტრალური დენი სრულად გათიშა და საყოფაცხოვრებო ტექნიკა ავტომობილს სპეციალური V2L ადაპტერის საშუალებით დაუკავშირა. ელექტრომობილის ენერგიაზე გადაიყვანეს თითქმის ყველაფერი, რაც ყოველდღიურობაში გჭირდებათ — მაცივარი, მიკროტალღური ღუმელი, ტოსტერი, ჭურჭლის სარეცხი მანქანა და მტვერსასრუტიც კი.

შედეგმა ყოველგვარ მოლოდინს გადააჭარბა. 24 საათის განმავლობაში, რომლის ფარგლებშიც ავტომობილით 15 მილის მანძილიც დაფარეს, Leapmotor B10-ის ელემენტის მუხტი 100%-იდან მხოლოდ 76%-მდე შემცირდა. ანუ, მთელი დღე-ღამის განმავლობაში საყოფაცხოვრებო ტექნიკის მუშაობასა და მოკლე მგზავრობაზე ელემენტის სულ რაღაც 24% დაიხარჯა. მაცივარში ოპტიმალური ტემპერატურა შეინარჩუნეს, სახლი დაალაგეს და ვახშამიც უპრობლემოდ მომზადდა.

მიუხედავად ასეთი შთამბეჭდავი შედეგისა, ექსპერტები განმარტავენ, რომ V2L სისტემა იდეალური დროებითი გამოსავალია ელექტროენერგიის ავარიული გამორთვისას, კრიზისულ სიტუაციებში ან ქალაქგარეთ მოგზაურობისას. ხანგრძლივ პერსპექტივაში იგი ვერ ჩაანაცვლებს სახლის ძირითად ელექტროქსელს, რადგან მუდმივმა დატვირთვამ შესაძლოა ელემენტის ნაადრევი დეგრადაცია და ძაბვის ცვალებადობა გამოიწვიოს.

მიუხედავად ამისა, ფაქტი, რომ თანამედროვე ჩინურ ელექტრომობილს შეუძლია არა მხოლოდ გადაადგილება, არამედ მთელი სახლის ენერგომომარაგებაც, ავტოინდუსტრიაში მიმდინარე ტექნოლოგიურ რევოლუციას ხაზს კიდევ ერთხელ უსვამს.