ოდესღაც Kia როდსტერს აწარმოებდა — ახლა ერთ-ერთი მათგანი აუქციონზე იყიდება
Kia-ს ამჟამინდელი საწარმოო ხაზი თითქმის ყველა სეგმენტს ფარავს, თუმცა არის ერთი მიმართულება, რომელსაც კორეული ბრენდი იშვიათად ეხება — ნამდვილი სპორტული ავტომობილები. აქ არ იგულისხმება სწრაფი სედანები ან მძლავრი ქროსოვერები, არამედ დაბალი, მსუბუქი და ორადგილიანი როდსტერები. თუმცა, 90-იან წლებში არსებობდა მცირე პერიოდი, როცა Kia ზუსტად ასეთ მოდელს ყიდდა.
გაიცანით Kia Vigato — ავტომობილი, რომელიც რეალურად რებრენდირებული Lotus Elan M100-ია. ამ იშვიათი მოდელის ერთ-ერთი ეგზემპლარი ამჟამად აუქციონზეა გამოტანილი და მას საკმაოდ საინტერესო ისტორია აქვს.
როგორ იქცა Lotus-ი Kia-დ?
ჰო, საინტერესო კითხვაა, თუმცა ყველაფერი საკმაოდ მარტივად არის — მას შემდეგ, რაც ბრიტანულმა Lotus-მა Elan-ის წარმოება შეწყვიტა, კორეულმა ავტომწარმოებელმა მოდელის საწარმოო ხაზი და უფლებები შეიძინა, რათა ავტომობილისთვის ახალი სული საკუთარი სახელით შთაებერა. სამხრეთ კორეაში მას Kia Elan ერქვა, ხოლო იაპონიის ბაზარზე Kia Vigato-ს სახელით იცნობდნენ.
კონკრეტული მოდელი, რომელიც ახლა იყიდება, სწორედ იაპონიიდან კანადაში 2022 წელს იმპორტირებული ეგზემპლარია. მას თეთრი კორპუსი, შავი რბილი სახურავი და 16-დუიმიანი OZ Racing-ის დისკები აქვს. მოდელის გარბენი 30 წლის ავტომობილისთვის გასაოცრად მცირეა — მხოლოდ 53 000 კილომეტრი...
Vigato 1.8-ლიტრიანი ატმოსფერული ოთხცილინდრიანი ძრავითაა აღჭურვილი, რომელიც 151 ცხენის ძალას გამოიმუშავებს და ხუთსიჩქარიან მექანიკურ გადაცემათა კოლოფთან არის შეწყვილებული. ტრადიციული როდსტერებისგან განსხვავებით, ეს მოდელი წინაამძრავიანია, რაც ერთ-ერთი მიზეზი იყო იმისა, რატომაც მან პოპულარობა Lotus-ის ფანებში დიდად ვერ მოიპოვა.
თუმცა, მიუხედავად ამისა, ავტომობილი მაინც იყენებს Lotus-ის საფირმო დამოუკიდებელ დაკიდების სისტემას (double-wishbone), რაც მას მართვის გამორჩეულ ხასიათს ანიჭებს. 
ავტომობილის სალონი 90-იანების რეტრო სტილს ასხივებს — შავი სავარძლები ფერადი ჩანართებით, Mitsubishi-ს ბრენდის ორიგინალი მაგნიტოფონი და MOMO-ს საჭე. საინტერესოა, რომ წინა მფლობელმა Kia-ს ლოგოები Lotus-ის ნიშნებით შეცვალა, რაც ხშირად ხდება ამ მოდელის შემთხვევაში.
ამ დროისთვის აუქციონზე მაქსიმალური ფსონი მხოლოდ 7 100$-ს შეადგენს — ეს ავტომობილი რბოლებს ვერ მოიგებს, მაგრამ თავისი უნიკალური ისტორიითა და ვიზუალით ყურადღების ცენტრში ყოველთვის მოხვდება. ეს არის იდეალური შანსი კოლექციონერებისთვის, დაეუფლონ ბრიტანული ინჟინერიისა და კორეული ამბიციის იშვიათ ნაზავს.
