ახალი Ford Focus RS-ის მოლოდინში: Mountune-ის 2020 Ford Focus ST

ახალი ჰეჩბეკი ბოლო Focus RS-ს მხოლოდ 20 ცხენით ჩამორჩება.

Mountune უკვე დიდი ხანია, რაც „ფორდის“ ძრავების გაძლიერებაზე მუშაობს, ძირითადად EcoBoost-ის ძრავებზე, რომლებიც უმეტეს წილად Fiesta-სა და Focus-ში გვხვდება. მათი ყველაზე ცნობილი ნამუშევარი 684-ცხენისძალიანი მესამე თაობის Ford Focus RS გახლავთ. 

ამერიკულმა მწარმოებელმა მეოთხე თაობის „ფოკუსის“ RS ვერსია არ გვაღირსა, ამიტომ Mountune-ის გუნდმა ახალი Ford Focus ST-ს დატუნინგება გადაწყვიტა.

ცვლილებების შედეგად 2,3-ლიტრიან ძრავას 50 ცხენის ძალა და 95 ნმ მაბრუნი მომენტი მოუმატეს. 325 ცხენის ძალით ახალი Focus ST ბოლო Focus RS-ს მხოლოდ 20 ცხენით ჩამორჩება, სამაგიეროდ მაბრუნი მომენტი 41 ნმ-ით მეტი აქვს.

Mountune აცხადებს, რომ მათ მიერ გადამუშავებული Ford Focus ST 100კმ/სთ-მდე აჩქარებას 5 წამზე ოდნავ მეტს ანდომებს. Focus RS-ზე სწრაფი ნამდვილად არაა, მაგრამ სტანდარტულ 2020 Ford Focus ST-ს ყველაზე ცოტა ნახევარ წამს უგებს.

ტუნინგის ღირებულება £599-ს შეადგენს, რადგან მხოლოდ კომპიუტერული ჩარევაა საჭირო. Mountune ასევე გარანტიას იძლევა და მათი m300 Package-ის დაყენება მომხმარებელს თავადაც შეუძლია, რადგან ტუნინგის გააქტიურება OBD პორტის და მობილური აპლიკაციის მეშვეობით შეიძლება.

ჭორები დადის, რომ „ფორდის“ ბრიტანეთის ქარხანაში ახალ Focus RS-ზე მუშაობენ და გამოშვებას აპირებენ, მაგრამ წარდგენის თარიღი ჯერ უცნობია. გასაკვირიც არაა, რადგან ავტომობილის ძალოვანი აგრეგატი საერთოდ არაა მზად. ძრავას  შემუშავების პროცესში მათ გამონაბოლქვის ახალი მკაცრი რეგულაციები ვერ დააკმაყოფილეს.