BMW მე-8 სერიას ემშვიდობება | როგორი იქნება E31 თაობით შთაგონებული მოდელი?

BMW მერვე სერიას რეტრო სტილის ელფერით ემშვიდობება. გრანდ ტურერი, რომლის წარმოებაც მომავალ წელს დასრულდება, 1990-იანი წლების ორიგინალი მოდელის პატივსაცემად, შეზღუდული გამოშვების M Heritage-ს შემოგვთავაზებს. თანაც, განსაკუთრებულ ფერებში.

M850i xDrive Gran Coupe-ზე დაფუძნებული ავტომობილი მხოლოდ 500 ეგზემპლარად იწარმოება. Edition M Heritage პატივს E31 თაობის მერვე სერიას მიაგებს, რომელიც გაყიდვაში 1990 წლიდან 1999 წლამდე იყო. მსურველებს კი, ფერთა ფართო არჩევანი ექნებათ:  „კაშკაშა წითელი“, „მავრიკის ლურჯი“, „კოსმოსური შავი“, „დეიტონას იისფერი“ და „ოქსფორდის მწვანე“.

განსაკუთრებული შტრიხები ამით არ მთავრდება. ფერთა არჩევანის მიუხედავად, Edition M Heritage-ს კარბონის სახურავი, M-ის სამფეროვანი ზოლები აქვს და 20-ინჩიან შენადნობის დისკებზე დგას. ამ შემთხვევაში მოდელის სტანდარტულ კომპლექტაციას M Sport Professional-ი მოჰყვება - უკეთესი მუხრუჭებითა და შავი კალიპერებით. ინტერიერში უფრო მეტ ცვლილებას ვხვდებით - M Sport სავარძლები ალკანტარითა და ტყავითაა დაფარული, ალკანტარათია დაფარული ხელსაწყოთა პანელი და კარის პანელებიც.

Edition M Heritage-ის შესაძლებლობები სტანდარტული M850i xDrive Grand Coupe-სგან უცვლელია. ეს ნიშნავს, რომ ავტომობილის კაპოტქვეშ 4.4-ლიტრიანი ბიტურბო V8 ძრავაა მოთავსებული, რომელიც 523 ცხენის ძალას და 750 ნიუტონ მეტრს გამოიმუშავებს. 8-სიჩქარიანი ავტომატური გადაცემათა კოლოფის საშუალებით ძრავიდან წამოსული სიმძლავრე ოთხივე ბორბალზე ნაწილდება. BMW 0-დან 100-მდე 3.9 წამში ჩქარდება, ხოლო ელექტრონულად შეზღუდული მაქსიმალური სიჩქარე 250 კმ/სთ-ს აღწევს.

Edition M Heritage-ის საცალო ფასი 131 575 აშშ დოლარია, მათ შორის 1 175 აშშ დოლარი დანიშნულების ადგილზე მიტანის საფასური. ეს ღირებულება სტანდარტულ M850i Gran Coupe-თან შედარებით 23 000 აშშ დოლარით მეტია. ახალი და უკანასკნელი მერვე სერიის წარმოება 2025 წლის ბოლოს დაიწყება, ხოლო მიწოდება მომავალი წლის დასაწყისშია დაგეგმილი.