„გააჩერეთ ავტომობილები შენობებისგან მოშორებით“ | BMW და Toyota მძღოლებს აფრთხილებენ

გერმანულმა მწარმოებელმა ავტომობილების უკან გაწვევის ახალი რაუნდი გამოაცხადა. არსებული ცნობებით, BMW ამერიკის შეერთებულ შტატებში დახლოებით 200 000-ს, ხოლო გერმანიაში 136 500 ერთეულ ავტომობილს გაიწვევს. თუმცა, ვარაუდობენ, რომ ეს რიცხვი მომავალში კიდევ უფრო გაიზრდება.

BMW-ის უახლესი გაწვევის რაუნდი ევროპაში, აზიასა და მის ფარგლებს გარეთ, 2015 წლის სექტემბრიდან 2021 წლის სექტემბრამდე წარმოებულ მოდელებს მოიცავს. თუმცა, ერთობლივი განვითარების პროგრამის გამო, ეს გაწვევა Toyota-ს 1 500-მდე მოდელაც შეეხება.

ხოლო შეერთებულ შტატებში BMW 194 886 ერთეული ავტომობილის გამოხმობას გეგმავს, რომლებიც 2019-დან 2022 წლამდე პერიოდშია წარმოებული - დაწყებული პატარა ზომის მეორე სერიიის კუპეთი, დასრულებული მესამე, სპორტული მეოთხე და მეხუთე სერიით, ასევე X3-ისა და X4-ის SUV-ებით. გაწვევა შეეხება Toyota Supra-ს 1 469 ეგზემპლარსაც.

ერთი შეხედვით უცნაურია, რა საერთო აქვთ ამ ძალიან განსხვავებული ზომისა და ფორმის მოდელებს. დამაკავშირებელი ხაზი კი, B58 3-ლიტრიანი, 6-ცილინდრიანი ტურბოძრავაა. BMW-ის წინასწარი მოკვლევით, წყალი შესაძლოა სტარტერის ამუშავების რელეზე მოხვდეს, რაც დროთა განმავლობაში კოროზიის მიზეზად იქცევა.

Valeo-ს მიერ წარმოებული სტარტერის შიდა კოროზიამ შესაძლოა გავლენა ელექტროკავშირზე იქონიოს, რაც მის მუშაობაზეც აისახება. ხოლო ყველაზე ცუდ ვითარებაში მოკლე ჩართვაში გამოვლინდება და ხანძარს გამოიწვევს.

BMW-მ დილერებთან ამ საკითხის განხილვა უკვე დაიწყო. მომხმარებლები შეტყობინებებს ნოემბრის თვეში მიიღებენ. ჩანაცვლების დასრულებამდე კი, ავტომწარმოებლები მძღოლებს მოუწოდებენ, მანქანები შენობებისგან მოშორებით განათავსონ.