ამ მცირე ზომის ამერიკულმა ავტომწარმოებელმა Koenigsegg-ს რეკორდი ჩამოართვა

უკანასკნელი რამდენიმე წლის განმავლობაში, კალიფორნიაში მდებარე ცნობილ სარბოლო ტრეკზე, Laguna Seca-ზე რეკორდისთვის, ერთმანეთს ორად ორი ავტომწარმოებელი უპირისპირდება — Koenigsegg-ი და Czinger-ი. ამჯერად კი, ეს რეკორდი შედარებით მცირე ზომის ამერიკულმა ავტომწარმოებელმა, Czinger-მა დაისაკუთრა.

ეს კონკრეტული საგა 2021 წლის ივლისში დაიწყო. მაშინ, როდესაც Czinger-მა თავისი ჯერ კიდევ არასრული წარმოების 21C-ით, 1:25.44-იანი შედეგი დააფიქსირა და ავტოინდუსტრია შოკში ჩააგდო. მაშინ, Czinger-მა ეს რეკორდი McLaren Senna-ს ჩამოართვა.

თუმცა 2024 წლის აგვისტოში, მონტერეის ავტომობილების კვირეულის დროს, Koenigsegg Jesko-მ კონკურენტს 1:24.86-იანი წრით უპასუხა. სულ რაღაც რამდენიმე დღეში, Czinger-ი კალიფორნიის ტრეკზე დაბრუნდა და დრო 1:24.75-მდე შეამცირა.

წელს, Czinger-მა, თავისი 21C-ით, მსოფლიო შემოიარა და ხუთი წრის რეკორდიც დაამყარა, მათ შორის ერთი Laguna Seca-ზე, სადაც მან 1:24.39 დააფიქსირა. თუმცა Koenigsegg-მა უკან არც ამჯერად დაიხია და ახალი რეკორდით, 1:24.16-ით კიდევ ერთხელ უპასუხა.

არ გაგიკვირდებათ და სიტუაცია კვლავ შეიცვალა. Czinger-მა 21C-ის დახმარებით, ლიდერობა დაიბრუნა და თან, ბევრად შთამბეჭდავი შედეგითაც. ახალი წრის რეკორდი 1:22.30-ია და ეს თითქმის ორი სრული წამით სწრაფია, ვიდრე Koenigsegg.

თან საინტერესოა ისიც, რომ ჩვენ ჰიპერქარების ისეთ ისტორიულ მწარმოებლებზეც არ ვსაუბრობთ, როგორებიც Lamborghini და Ferrari-ია. როგორც Koenigsegg-ი, ასევე, Czinger-იც ამ სფეროში შედარებით ახალი მოთამაშეები არიან, მაგრამ ეს მათ შედეგებზე ნამდვილად არ აისახება. მაგრამ ისინი ვითარდებიან, შედარებით უხმაუროდაც კი და რეკორდებსაც რეკორდებზე ხსნიან.