იშვიათი შანსი კოლექციონერებისთვის: აუქციონზე 2000-იანების საუკეთესო Shelby-ები იყიდება
თანამედროვე „მასლ ქარების“ მოყვარულებს Shelby GT500-ის მსგავსად ცოტა ავტომობილი თუ უყვართ. თუმცა, იშვიათია 2000-იანი წლების ბოლოს გამოსული მოდელების ისეთი ხელუხლებელი ეგზემპლარები ვიპოვოთ, როგორიც მომდევნო კვირაში აუქციონზე გამოჩნდება. კერძოდ, მომდევნო კვირაში აუქციონზე 2007 და 2009 წლების მოდელის ორი შესანიშნავად შემონახული ეგზემპლარი გაიყიდება, რომლებიც ყურადღებას არა მხოლოდ მათი მდგომარეობით, არამედ საოცრად დაბალი გარბენითაც მიიპყრობენ.
ამ ორი მოდელიდან ერთი წითელი ფერის, 2007 წლის Mustang GT500-ია (აწყობილი 2006 წელს) — თეთრი სარბოლო ზოლებითა და მხოლოდ 18-კილომეტრიანი გარბენით. ავტომობილის საწყისი რეკომენდებული ფასი $43 570 იყო, რაც, ინფლაციის გათვალისწინებით, დღევანდელი $70 000-ია. ასეთი მონაცემებით, შეიძლება იმის თქმაც, რომ ფასი თავდაპირველ ღირებულებაზე გაცილებით მაღალი იქნება.
GAA Classic Cars-ის განცხადება ავტომობილის წინა მფლობელის შესახებ ძალიან მცირე ინფორმაციას გვაძლევს. ასევე არ არის მითითებული, თუ სად და როგორ ინახებოდა ავტომობილი ბოლო ორი ათწლეულის განმავლობაში. ასეთი დაბალი გარბენით მსგავსი „მასლ ქარი“ მართლაც მიმზიდველი ლოტია, თუმცა ის ფაქტიცაა გასათვალისწინებელი, რომ ავტომობილის ამდენი წლით უძრავად დატოვება, სათანადო მოვლის გარეშე, დაუშვებელია.
თუ ეს GT500 წლების განმავლობაში ხელუხლებლად იყო გაჩერებული, სავარაუდოდ, საფუძვლიანი შემოწმება და სერვისი დასჭირდება. თუმცა, ისიც უნდა ვაღიაროთ, რომ მომავალი მფლობელი მას უფრო ინვესტიციად გამოიყენებს, ვიდრე სამართავად. ეს კი ძალიან სამწუხაროა იმის გათვალისწინებით, რომ კაპოტის ქვეშ სუპერჩარჯერიანი $5.4$-ლიტრიანი $V8$ ძრავა იმალება. შედეგად, GT500-ის სიმძლავრე 500 ცხენის ძალასა და 650 ნიუტონ-მეტრს აღწევს, რაც მას სერიოზულ მაჩვენებლად აქცევს დღევანდელი სტანდარტებითაც კი.
GAA Classic Cars-ის მიერ შემოთავაზებული მეორე, დაბალი გარბენის მქონე GT500-ის შეძენა კი, შესაძლოა, უფრო ძვირი დაგიჯდეთ. ეს არის 2009 წლის GT500KR, აწყობილი 2008 წელს. იგი ერთ-ერთი უიშვიათესი მოდელია, რადგან სულ 712 ეგზემპლარად იქნა წარმოებული. ვერცხლისფერი და ლურჯი სარბოლო ზოლებით შეღებილი ავტომობილის ოდომეტრზე კი სულ 40 კილომეტრია მითითებული.
Ford-მა KR ვერსიით უფრო მძლავრი ძრავა შემოგვთავაზა — 540 ცხენის ძალითა და 691 ნიუტონ-მეტრით. KR კარბონის კაპოტითა და უნიკალური გამონაბოლქვი სისტემითაა აღჭურვილი. ამ მოდელის რეკომენდებული საცალო ფასი $46 890 იყო, რასაც ემატებოდა KR-ის პაკეტი, რომელიც ფასს $35 500-ს ჰმატებდა. შედეგად, ჯამური ღირებულება $80 000-ს აღწევდა, რაც, ინფლაციის გათვალისწინებით, დღევანდელი $122 000-ია.
