Mercedes-ი 4-ცილინდრიანი SL-ის წარმოებას წყვეტს, თუმცა მას უკეთესი ვერსიით ანაცვლებს

გავრცელებული, თუმცა ჯერ კიდევ დაუდასტურებელი ინფორმაციით, გერმანული ავტომწარმოებელი Mercedes-Benz-ი საბაზისო დონის SL-ში მნიშვნელოვან ცვლილებებს ახორციელებს. 2027 წლის განახლებებში, ავტომწარმოებელი ამჟამინდელ ოთხცილინდრიან ძრავას ექვსცილინდრიანი ვერსიით ჩაანაცვლებს.

Auto Motor Und Sport-ის ახალი რეპორტაჟის თანახმად, Mercedes-ი SL43-ისთვის განკუთვნილი M139 ძრავის წარმოებას შეწყვეტს. მიზეზი მარტივია — აღნიშნული ძრავა „ევრო 7“-ის გამონაბოლქვის სტანდარტებს არ აკმაყოფილებს. სავარაუდოდ, გერმანული ავტომწარმოებელი მას M256 Evo-თი ჩაანაცვლებს — ეს უკანასკნელი 3-ლიტრიანი, ერთრიგა, 6-ცილინდრიანი mild-ჰიბრიდული ძრავაა, რომელსაც შიდა წრეებში AMG SL53-ის სახელით მოიხსენიებენ.

Mercedes-ის განახლებული ძრავა, სავარაუდოდ, 449 ცხენის ძალას გამოიმუშავებს, რასაც 23 ცხენის ძალის ინტეგრირებული სტარტერ-გენერატორი დაემატება. სტანდარტულად SL53 სრულამძრავი სისტემით აღიჭურვება, განსხვავებით SL43-ისგან, რომელიც უკანამძრავი იყო.

გავრცელებული ინფორმაციითვე, Mercedes-ი V8 ძრავის ჩანაცვლებასაც გეგმავს, რომელიც SL55-სა და SL63-ისთვისაა განკუთვნილი. 4-ლიტრიანი ტვინტურბო ძრავის მუხლა ლილვი ურთიერთპერპენდიკულარულ სიბრტყეებში (ერთმანეთის მიმართ 90°-ით განლაგებული ბარბაცას ყელებით) აღარ იქნება და 180°-იანი განლაგებით შეიცვლება, შესაბამისად მუხლა ლილვი ერთ სიბრტყეში განთავსდება. ეს გაზრდის წარმადობას და, ამავდროულად, გამონაბოლქვზე გამკაცრებულ სტანდარტებსაც დააკმაყოფილებს.

ასევე დაგაინტერესებთ: Mercedes-ის დაბადება, ისტორია რომელმაც შეცვალა სამყარო 

SL55-ში აღნიშნული ძრავა 537 ცხენის ძალას გამოიმუშავებს, ხოლო SL63-ში 650 ცხენის ძალამდე აღწევს. ამჟამინდელ 55-ში ძრავა 469 ცხენის ძალას, ხოლო 63-ში 577 ცხენის ძალას გვთავაზობს. ცნობისთვის, ანგარიშში მოცემული არაა კონკრეტული დეტალები SL63 S E Performance-ის პლაგინ-ჰიბრიდის შესახებ. ამ მოდელში V8 ძრავა, ელექტროძრავასთან ერთად, 805 ცხენის ძალას გამოიმუშავებს, თუმცა ვიმედოვნებთ, რომ ახალი V8 ძრავა 880 ცხენის ძალას გადააჭარბებს.