Lamborghini-ს საჩუქარი საკუთარ თავს 63 წლის იუბილეზე: 1 065 ცხ.ძ-იანი როდსტერი
საიუბილეო მოდელისთვის, რომელიც მხოლოდ 15 ეგზემპლარად გამოვა, Lambo-მ უსახურავო სტილი და ყველაზე მძლავრი plug-in ჰიბრიდული V12 ძრავა შეარჩია.
Lamborghini თავისი დაარსებიდან 63-ე წლისთავს აღნიშნავს და ამ ფაქტის აღსანიშნავად, თავის ისტორიაში ყველაზე მძლავრი ღია სახურავიანი ავტომობილი — Fenomeno Roadster-ი წარადგინა. ახალი მოდელი დახურულსახურავიანი სტილის Fenomeno-ს ხაზის გაგრძელებაა, რომლის დებიუტიც 2025 წლის აგვისტოში შედგა, თუმცა ბევრად უფრო იშვიათია. Lamborghini მას მხოლოდ 15 ეგზემპლარად გამოუშვებს, რაც კუპეს 30 გაყიდულ ეგზემპლარზე ნახევარით ნაკლებია.
სხვა ღია სახურავიანი სუპერქარებისა და ჰიპერქარებისგან განსხვავებით, Fenomeno Roadster-ს გასაშლელი ან მოხსნადი სახურავი არ აქვს. სუპერქარის 2-ადგილიანი სალონი მუდმივად ღიაა, რამაც დიზაინერებს საშუალება მისცა, გვერდითა მინებისთვის „დაჭრილი“ ფორმა მიეცათ, ხოლო საქარე მინის კიდეზე კარბონის სპოილერი დაემატებინათ. კუპესთან შედარებით მნიშვნელოვანი ცვლილებაა გადაკეთებული ძრავის საფარი, ორი აეროდინამიკური „კუზით“, რომლებიც გადაბრუნებისგან დამცავი სტრუქტურის ფუნქციას ასრულებენ.
Lamborghini-ს თქმით, ახალი აეროდინამიკური ელემენტების დამატებითა და ავტომობილის „ზედა ფუნქციური ზედაპირების“ შეცვლით, დამწევი ძალა, ისევე როგორც სტაბილურობა, ბალანსი და გაგრილება, კუპეს დონეს უახლოვდება. აღსანიშნავია ფაქტიც, რომ ამ მოდელში, განახლებების მიუხედავად, წონის მატება მხოლოდ რამდენიმე კილოგრამით შემოიფარგლა.
საბაზისო მოდელისთვის Blu Cepheus-ის ფერი შეირჩა, რომელსაც Rosso Mars-ისა და კარბონის დეტალები ემატება. ინტერიერში კი შავი და წითელი თემატიკა ჭარბობს, Y-ისებრი ფორმის დეტალებითა და დახვეწილი ნაკერებით.
სტანდარტული Fenomeno-ს მსგავსად, Roadster-ი კარბონის მონოკოკურ შასიზეა დაფუძნებული და Lamborghini-ს ისტორიაში ყველაზე მძლავრი V12-ითაა აღჭურვილი. 6.5-ლიტრიანი ატმოსფერული ძრავა 824 ცხენის ძალასა და 725 ნიუტონ-მეტრს გამოიმუშავებს. სამი ელექტროძრავიდან ორი წინა ღერძზეა დამონტაჟებული, ხოლო მესამე — 8-სიჩქარიან ორმაგი გადაბმულობის გადაცემათა კოლოფშია ინტეგრირებული. ენერგიას სუპერქარი 7 კვტ/სთ აკუმულატორიდან იღებს.
შედეგად, კომბინირებული სიმძლავრე 1,065 ცხენის ძალას აღწევს, რითაც Revuelto-ს 1,001 ცხენის ძალასაც აღემატება. სიმძლავრე თითქმის იდენტურია Fenomeno-ს კუპეს შესაძლებლობისა. Lambo 0-დან 100-მდე 2.4 წამში, ხოლო 200 კმ/სთ-მდე 6.8 წამში ჩქარდება. მაქსიმალური სიჩქარე კი 340 კმ/სთ-ია.
საიუბილეო სუპერქარის ფასი ჯერ არ გახმაურებულა, თუმცა ცნობილია, რომ სუპერქარი მხოლოდ 15 ეგზემპლარად გამოვა. Fenomeno Roadster-ი ისეთი ულტრა-ექსკლუზიური მოდელების გზას აგრძელებს, როგორებიცაა Reventon, Veneno, Centenario და Sián Roadster-ი.
