ვიდეო: ქვიშაში ჩაფლული Tesla Cybertruck-ი საოჯახო მინივენმა გადაარჩინა

სოციალურ ქსელებში ამ უქმეებზე ვირუსულად გავრცელდა 36-წამიანი ვიდეო, რომელიც ინტერნეტ-ხუმრობებისთვის შესანიშნავ მასალას იძლევა. ფუტურისტული, ყველგანმავალი და ყოვლისშემძლე იმიჯის მქონე 3-ტონიანი ელექტრო პიკაპი, Tesla Cybertruck-ი, პლაჟის ქვიშაში გაიჭედა, საიდანაც ის ჩვეულებრივმა საოჯახო მინივენმა, Toyota Sienna-მ მარტივად ამოიყვანა.

თუმცა, თუ ვიდეოს საინჟინრო და უსაფრთხოების კუთხით შევხედავთ, სიტუაცია საკმაოდ სახიფათო იყო. პირველ რიგში, მთელი ეს „სამაშველო ოპერაცია“ უსაფრთხოების ელემენტარული წესების დარღვევით მიმდინარეობდა — უამრავი ადამიანი ახლოს იდგა დაჭიმულ ბაგირთან, რომლის გაწყვეტის შემთხვევაშიც მძიმე ტრავმისგან დაზღვეული არავინ იქნებოდა. გარდა ამისა, დამხმარე საშუალებად გამოყენებული ხის ბოძები Cybertruck-ის უზარმაზარი წონისა და მაბრუნი მომენტის პირობებში, შესაძლოა, ნამდვილ ჭურვად ქცეულიყო.

აღსანიშნავია Sienna-ს მძღოლის პროფესიონალიზმიც, რომელმაც ზედმეტი აგრესიის გარეშე, ნაზი აქსელერაციით, მძიმე პიკაპი ქვიშიდან წამებში გამოიყვანა (თანაც, Tesla-ს მძღოლის მიერ საჭის აქეთ-იქით ტრიალი და ქვიშის ფანტვა საქმეს უფრო ართულებდა).

რეალურად, ქვიშაში Cybertruck-ის მთავარი მტერი მისივე წონაა, რაც საბურავების ზედაპირზე „ტივტივს“ თითქმის შეუძლებელს ხდის, თუკი მძღოლმა წინასწარ არ იცის, როგორ მართოს ავტომობილი ასეთ რელიეფზე (მაგალითად, საბურავებში წნევის დაწევით).