როგორ მოიპარა შოუ ნიურბურგრინგის 24-საათიან რბოლაზე პატარა Dacia Logan-მა?

ნიურბურგრინგის 24-საათიანი რბოლა ყოველთვის სავსეა კონტრასტებით, თუმცა წლევანდელი უქმეები ამ მხრივ მაინც გამორჩეული აღმოჩნდა. სანამ მედია და გულშემატკივრები ფორმულა 1-ის ჩემპიონის, მაქს ფერსტაპენის დებიუტსა და მის მძლავრ Mercedes-AMG GT3-ს ადევნებდნენ თვალს, სოციალური ქსელები სრულიად მოულოდნელმა გმირმა — Olli’s Garage-ის პატარა Dacia Logan-მა დაიპყრო.

ეს 280-ცხენისძალიანი რუმინული ავტომობილი (Renault Megane RS-ის ძრავით) ნამდვილ ინტერნეტ-სენსაციად იქცა მას შემდეგ, რაც გავრცელდა კადრები, სადაც F1-ის ოთხგზის ჩემპიონი ფერსტაპენი ტრეკზე ამ პატარა საოჯახო სედანს უკან მიჰყვება და ფარების ციმციმით გზის დათმობას სთხოვს — ეს ნამდვილი საავტომობილო აბსურდია, თუმცა სწორედ „მწვანე ჯოჯოხეთის“ სილამაზე სწორედ ამაში მდგომარეობს.

მიუხედავად იმისა, რომ მაყურებელი ნიურბურგრინგზე მსოფლიოს უსწრაფესი მანქანების სანახავად მიდის, ხალხის გული მაინც სუსტების მხარესაა. როდესაც ფინიშამდე სულ რაღაც 3 საათით ადრე Dacia ბარიერს შეეჯახა და წინა მარცხენა საბურავი დაკარგა, გულშემატკივრებმა მხარდაჭერის ნიშნად იქუხეს. მიუხედავად ძრავის პრობლემებისა, რამდენიმე მოცურებისა და უამრავი დროითი ჯარიმისა (ტრეკზე არალეგალური მობრუნებისა და სიჩქარის გადაჭარბების გამო), გუნდმა მანქანის აწყობა შეძლო და რბოლა საპატიო 107-ე ადგილზე დაასრულა. პარალელურად, სუპერ მაქსის ეკიპაჟი ასპარეზობას ამძრავი ლილვის გატეხვის გამო გამოეთიშა.

ეს შემთხვევა კიდევ ერთხელ ამტკიცებს ძველ ჭეშმარიტებას: ნელი მანქანის სწრაფად მართვა გაცილებით უფრო აზარტული და ემოციურია, ვიდრე სწრაფი მანქანის ნელა ტარება.

ჩვენც ხშირად აღვნიშნავთ, რომ ემოციას მხოლოდ ცხენის ძალების რაოდენობა არ ქმნის. თქვენი აზრით, რატომ ახერხებს ასეთი მარტივი პროექტები მილიონიანი ბიუჯეტის მქონე ქარხნულ გუნდებზე მეტი სიმპათიის მოპოვებას და დააკლებდა თუ არა ნიურბურგრინგს სანახაობას მსგავსი ეკიპაჟების აკრძალვა?