Chevy ერთ-ერთ საუკეთესო V8 ძრავას ემშვიდობება, თუმცა ენთუზიასტებისთვის კარგი სიახლეებიც აქვს
ლეგენდარული LS9-ის წარმოება დასრულდა, თუმცა Chevy ძალიან მალე ახალ საავტომობილო საოცრებას გვპირდება.
წლების განმავლობაში არაერთი ტიპისა და მოცულობის შიგაწვის ძრავა გვინახავს, თუმცა ცოტას თუ აქვს ისეთივე გამძლეობა, როგორიც Chevrolet-ის საკულტო LS სერიას. მცირე ბლოკის V8 ძრავების სერია 70 წელზე მეტია არსებობს, თუმცა მისი ერთ-ერთი ყველაზე პოპულარული წარმომადგენელი მალე სამუდამოდ წარსულს ჩაბარდება.
Corvette Blogger-ის მიერ გავრცელებული ინფორმაციით, Chevy თავისი ლეგენდარული აგრეგატის, LS9 Long Block-ის „კრეიტ-ძრავის“ (ცალკე მზა აგრეგატი გასაყიდად) წარმოებას წყვეტს. Chevrolet-ის ოფიციალურ ვებგვერდზე ამ ინფორმაციის გადამოწმება კი ყველას შეუძლია, რადგან LS9-ის სურათის ქვემოთ ფრაზა „წარმოება შეწყვეტილია“ უკვე დატანილია.
ეს 6.2-ლიტრიანი, კომპრესორიანი მონსტრი ბაზარზე თითქმის 10 წლის განმავლობაში გამოდიოდა, ხოლო მისი დებიუტი C6 Corvette ZR1-ის კაპოტის ქვეშ შედგა. შესაძლებლობების პიკს კი ამ ძრავამ LS9-ის სახით მიაღწია, რომლის გამომუშავებაც 638 ცხენის ძალას აღწევდა. აგრეგატი ტიტანის ბარბაცებით, თუჯის ალუმინის ბლოკითა და ნაჭედი მბრუნავი დეტალებით იყო აღჭურვილი.
ასევე დაგაინტერესებთ: რომელია 10 ყველაზე გამძლე ძრავა ისტორიაში? (ნაწილი 1)
LS9 პოპულარული არჩევანი გახლდათ როგორც მისი სიმძლავრის, ასევე გამძლეობის გათვალისწინებითაც. სწორედ ამიტომ, „რესტომოდერებისა“ და ავტოენთუზიასტების ერთ-ერთ საყვარელ ძრავადაც რჩებოდა. მისი დახმარებით ენთუზიასტებმა არაერთი პროექტი შექმნეს და უფრო მეტიც, აგრეგატს ავსტრალიური HSV GTSR W1-იც კი იყენებდა. HSV GTSR W1-ში აგრეგატი 636 ცხენის ძალას გამოიმუშავებდა და ადგილობრივად წარმოებულ ყველაზე მძლავრ ავტომობილადაც ითვლებოდა. არ უნდა დავივიწყოთ ისიც, რომ ბევრისთვის უკვე მივიწყებული Equus Bass 770-იც ამ ძრავაზე მუშაობდა.
შესაბამისად, Chevrolet-სა და ბევრი ავტომოყვარულისთვის ეს ეპოქის დასასრულს ნიშნავს. მიუხედავად იმ ფაქტისა, რომ ავტომწარმოებელი ენთუზიასტებს კვლავ სთავაზობს სხვა კრეიტ-ძრავებს (რომელთაგანაც თითქმის ყველა ჩამორჩება სიმძლავრით LS9-ს), შეგიძლიათ მშვიდად იყოთ, რადგან LS9-ის სული დიდი ხნით არ გაქრება.
LS9-ის წარმოების შეწყვეტასთან ერთად, Chevy ახალ საოცრებას გვპირდება, თანაც უახლოეს მომავალში. Chevrolet Performance-ის Instagram-ის გვერდზე ცოტა ხნის წინ დამაიმედებელი წარწერით სურათიც გამოქვეყნდა. გამოქვეყნებულ ფოტოზე ძრავის ახლო ხედი ჩანს — მილები, კონექტორები და Chevrolet-ის ემბლემა, თუმცა სხვა არაფერი. მაგრამ კონსტრუქცია თითქმის იდენტურია იმისა, რასაც თანამედროვე V8 ძრავისგან ველით. და თუ Chevy-ს ბოლო დროინდელ განცხადებებსაც გავითვალისწინებთ — რვაცილინდრიანი ძრავების ერთგულებაზე — ლოგიკურია, რომ სრულიად ახალი V8-ის გამოჩენის იმედს ვიტოვებთ.
View this post on Instagram
შეგახსენებთ, რომ რამდენიმე თვის წინ General Motors-მა მცირე ბლოკის V8 ძრავების განსავითარებლად Tonawanda-ს საწარმოში $888 მილიონის ინვესტიციაც ჩადო. ახალი თაობის V8 აგრეგატები თავდაპირველად ავტომწარმოებლის პიკაპებში გამოჩნდება, შემდგომ კი, სავარაუდოდ, მომდევნო თაობის სპორტულ ავტომობილებშიც უნდა ველოდოთ.
