ასე გამოიყურება ძრავა, რომელმაც წყალქვეშ 4 წელი გაატარა

როდესაც ავტომობილს ტბიდან ან გუბიდან ამოათრევენ, სადაც ის გაურკვეველი დროით იყო ჩაძირული, შედეგი სასიამოვნო არასდროს არის. აბა, სხვას რას უნდა ელოდო? საგამოფენო სილამაზეს, რომელსაც უბრალოდ თევზის სუნი ასდის? ნებისმიერ შემთხვევაში, Chevy Camaro SS-ის ეს 6.2-ლიტრიანი V8 ძრავა, რომელიც წლების განმავლობაში ოჰაიოს მდინარეში იდო, ამის საუკეთესო მაგალითია. ის არა მხოლოდ გარედანაა დაჟანგული და მოლუსკებით დაფარული, არამედ შიგნიდანაც სავსეა ტალახით, ზეთითა და ათასგვარი ლორწოვანი მასით.

მათთვის, ვისაც ბევრი თავისუფალი დრო აქვს, იუთუბ არხზე I Do Cars მთლიანი, ერთსაათიანი ვიდეო დევს, სადაც ამ აგრეგატის დაშლის პროცესია ასახული. თუ დრო გაქვთ, მაშინ მოგიყვებით, თუ რამდენად სავალალო მდგომარეობაშია ეს ძრავა. ზედაპირული დათვალიერება ამ L99 V8-ის მძიმე ბედზე ბევრს არაფერს ამბობს. არხის წამყვანს, ერიკს, უმეტეს ჭანჭიკზე ქანჩის გასაღების მორგებაც კი უჭირს, რადგან ისინი გაურკვეველი ნივთიერებითაა დაფარული. ძრავზე ვერცხლისფერი თითქმის აღარაფერი დარჩენილა – ის უფრო ნარინჯისფერი და ყავისფერია.

პირველი საქმე ზეთის დამცლელი ბოლტის მოხსნა იყო. ამის შემდეგ ძრავიდან მდინარის დამდგარი წყალი წამოვიდა. ბოლოს კი ნაგვის ნარჩენებთან ერთად წამოსული ბლანტი ზეთიც გამოჩნდა. შემშვები კოლექტორი კარგ მდგომარეობაში აღმოჩნდა, თუმცა სარქვლის სახურავების მოხსნამ ნამდვილი საშინელება გამოაჩინა: დეტალები ჟანგმა თითქმის სრულად შეჭამა.

ცილინდრების უმეტესობა ტალახით იყო გატენილი, თუმცა, გასაკვირია, რომ თავად მილისები კატასტროფულად არ დაზიანებულა. ერთი მათგანი სუფთაც კი იყო, ალბათ იმიტომ, რომ ჩაძირვამდე ძრავმა მუშაობა მყისიერად შეწყვიტა. მიუხედავად ამისა, არსებული ჟანგის გამო ისინი მაინც უვარგისია და რადგან მათი ახლით შეცვლა მარტივია, აზრი არ აქვს ძველის გადარჩენაზე წვალებას. დგუშებსაც არ დადგომიათ უკეთესი დღე — იუთუბერს სამი დაჟანგული დგუშის ამოღება მოუწია მხოლოდ იმისთვის, რომ მუხლა ლილვი ადგილიდან დაეძრა. როდესაც ლილვი საბოლოოდ დატრიალდა, ძრავიდან დიდი რაოდენობით გამხმარი ჭუჭყი გადმოიყარა. ამ შედეგის მიღწევას დიდი შრომა დასჭირდა და ყოველი ნაბიჯი საშინელ სიბინძურესთან იყო დაკავშირებული.

ვიზუალურად ყველაზე არასასიამოვნო მაინც გამანაწილებელი ლილვის ამოღება იყო, ასევე გადაცემათა კოლოფის კორპუსისა და ჰიდროტრანსფორმატორის მოხსნა. ბევრს ასეთ სამუშაოსთან შეხებაც არ მოუნდებოდა, თუმცა ამ კაცმა ზუსტად იცოდა, რასაც ეჭიდებოდა. ძრავის სრულად დაშლის შემდეგ ერიკი სასიამოვნოდ გაოცებული დარჩა იმით, თუ როგორ გაუძლო აგრეგატმა ასეთ გარემოს.

„ეს ყველაფერი დაიშალა, რასაც საერთოდ არ ველოდი. მხოლოდ გამოსაბოლქვი კოლექტორის ერთი ჭანჭიკი გატყდა, თუმცა ეს მაშინაც ხდება ხოლმე, როცა მანქანა მდინარეში, ტბაში ან გუბეში საერთოდ არ ჩავარდნილა. უბრალოდ ვერ ვიჯერებ, რომ ყველაფრის დაშლა მოვახერხე“, — 

ასე რომ, კომპლიმენტები General Motors-ის გუნდს — ეს კიდევ ერთი მიზეზია, რის გამოც LS ოჯახის ძრავები ასე ძლიერ გვიყვარს.