BMW უარს ამბობს ტრადიციულ ღილაკებსა და გადამრთველებზე — მიზანი ახალგაზრდა მყიდველების მიზიდვაა
BMW-ს ინტერიერი მუდამ გამოირჩეოდა მძღოლზე ორიენტირებული განლაგებით. თუმცა, ბავარიული ბრენდი — მრავალი სხვა ავტომწარმოებლის მსგავსად — თანდათან უარს ამბობს ფიზიკურ გადამრთველებზე.
ასევე იხილეთ: BMW-ს ბურუსით მოცული წარსული და აქამდე უცნობი ფაქტები
BMW-ს უახლეს მოდელებში, როგორიცაა Neue Klasse-ს პლატფორმაზე აგებული iX3, კლიმატ-კონტროლის ფიზიკურ ღილაკებს ვეღარ შეხვდებით. ახალ საშუალო ზომის ელექტრო-SUV-ში ცენტრალურ კონსოლზე მხოლოდ რამდენიმე ფიზიკური გადამრთველია დარჩენილი, ხელსაწყოების პანელზე კი საერთოდ არაფერია — ფუნქციების უმეტესობა სენსორული ეკრანიდან ან ხმოვანი ბრძანებებით იმართება.
„ფიქრობ, ჯერ უნდა გაიგო, რატომ ხდება ეს ცვლილება, ამის შემდეგ კი ბევრად მარტივია იმის აღქმა, თუ რა იქნება მომავალში.
ავტომობილი არ არის ცალკე მდგომი ნივთი, ის იმ საზოგადოებისა და გარემოს ნაწილია, რომელშიც ვცხოვრობთ. ჩვენ ვხედავთ, რომ ხმოვანი და სენსორული მართვა სულ უფრო პოპულარული ხდება. შესაძლოა, ეს თაობათა შორის განსხვავებაც იყოს. შეამჩნევდით, რომ ახალგაზრდა თაობა — 45 წლამდე მომხმარებლები — ამ ტექნოლოგიებს ბევრად სწრაფად ითვისებს და აქტიურად იყენებს როგორც ხმოვან ბრძანებებს, ისე სენსორულ ეკრანებს.
მათ სურთ, რომ ყველაფერი სწრაფად გაკეთდეს, რადგან ერთდროულად რამდენიმე ამოცანაზე არიან ფოკუსირებულნი. ჩვენ ეს ფაქტორი აუცილებლად უნდა გავითვალისწინოთ. ასეთია მომხმარებლის ევოლუცია.“ — განუცხადა CarExpert-ს BMW Group Australia-ს გენერალურმა დირექტორმა იმ კითხვაზე საპასუხოდ, თუ როგორ იღებენ მომხმარებლები ახალი თაობის ინტერიერს.
ახალი iX3 არა მხოლოდ პირველი მოდელია სრულიად ახალ Neue Klasse პლატფორმაზე, არამედ პირველი სერიული ავტომობილია, რომელიც BMW-ს ინტერიერის ახალ დიზაინერულ ენას იყენებს.
ეს მოიცავს BMW Panoramic iDrive სისტემას, რომლის ეკრანიც საქარე მინის ძირის გასწვრივ არის გადაჭიმული. ის ავსებს ტრადიციულ პროექციულ ეკრანს და საინფორმაციო-გასართობ ეკრანს — რითაც მთლიანად ანაცვლებს ტრადიციულ ციფრულ ინსტრუმენტთა პანელს.
საჭის სვეტის ტრადიციული გადამრთველები iX3-ში შენარჩუნებულია, ხოლო საჭეზე კომპანიამ გამოიყენა ე.წ. „ShyTech“ ტექნოლოგია — ღილაკები მხოლოდ მაშინ განათდება, როდესაც შესაბამისი ფუნქცია ხელმისაწვდომია. მიუხედავად იმისა, რომ კლიმატ-კონტროლისთვის ტრადიციული ღილაკები ან რეგულატორები აღარ არსებობს, მართვის ელემენტები მუდმივად ფიქსირებულია სენსორული ეკრანის ქვედა ნაწილში.
ინტერიერის მინიმალიზმში უდავო ლიდერი Tesla-ა, რომელმაც დაამტკიცა, თუ რამდენად ცოტა ფიზიკური ღილაკით არის შესაძლებელი ფონს გასვლა. Tesla-ში თითქმის ყველაფერი ეკრანიდან ან ხმოვანი ბრძანებებით იმართება. მეტიც, ამერიკულმა ბრენდმა დროებით მოხსნა მოხვევის მაჩვენებელი ტრადიციული ბერკეტებიც კი და ისინი საჭეზე განთავსებული ღილაკებით ჩაანაცვლა.
ჩინეთში Tesla-ს პოპულარობის გათვალისწინებით, გასაკვირი არ არის, რომ ჩინურმა ბრენდებმაც ენთუზიაზმით აიტაცეს მინიმალისტური ინტერიერის კონცეფცია. ამას მოჰყვა იაპონური და კორეული ბრენდების მიერაც ამ ტრენდის გაზიარება — ნაწილობრივ იმის გამო, რომ მათი ზოგიერთი მოდელი ჩინეთში იწარმოება ან სპეციალურად ჩინური ბაზრისთვის იქმნება.
iX3, ისევე როგორც მომავალი i3 სედანი, გლობალურ მოდელად შეიქმნა. თუმცა ის უმნიშვნელოვანესი ავტომობილია ჩინეთის ბაზრისთვისაც, სადაც მისი დაგრძელებული ბაზის (LWB) ვერსიაც გამოვა. ისევე, როგორც ჩინეთის მთავრობის ახალმა სტანდარტებმა აიძულა ბრენდები უარი ეთქვათ კორპუსში ჩამალულ კარის სახელურებზე, ავტომწარმოებლები მსოფლიოს უდიდეს საავტომობილო ბაზარზე მალე წააწყდებიან ახალ რეგულაციებს, რაც მათ ავტომობილების შეცვლას აიძულებს.
ჩინეთის ეროვნული სტანდარტი, რომლის ამოქმედებაც მიმდინარე წელს იგეგმებოდა, სავარაუდოდ, 2027 წლის 1 ივლისიდან შევა ძალაში. ამ პროექტის თანახმად, 19 ძირითადი ფუნქცია — მათ შორის ტრანსმისიის, მინის მწმენდების, მაშუქების, მოხვევის სიგნალებისა და ავარიული განათების მართვა — აუცილებლად უნდა ხორციელდებოდეს ეკრანის მიღმა არსებული ფიზიკური ელემენტებით. ამ ელემენტებს უნდა ჰქონდეთ ფიქსირებული ადგილი, მინიმუმ 10x10 მმ მოქმედების ფართობი და ტაქტილური (შეხებითი) ან ხმოვანი უკუკავშირი (მაგალითად: ღილაკები, გადამრთველები, მბრუნავი რეგულატორები და ბერკეტები).
