BMW-მ პირველი Alpina B7 ნარდოზე გამოცადა

თქვენ ახლა BMW Alpina-ს ახალი, ოთხკარიანი მდიდრული სედანის პირველ კადრებს უცქერთ, რომელიც შენიღბულ მე-7 სერიას საოცრად ჩამოგავს. შეიძლება იმიტომ, რომ ის მართლაც შენიღბული „შვიდიანია“ — და მან იტალიის ლეგენდარულ ნარდოს საცდელ ტრასაზე 300 კმ/სთ-იან ზღვარს უკვე გადააბიჯა. კეთილი იყოს თქვენი მობრძანება Alpina-ს ახალ ფილოსოფიაში: „სიჩქარე და არა აგრესიული სპორტულობა“.

ასევე იხილეთ: 7 ყველაზე ცუდი მანქანა, რაც „ბიემვის" ოდესმე შეუქმნია

„სიჩქარე ყოველთვის იყო Alpina-ს დნმ-ის განუყოფელი ნაწილი, თუმცა ჩვენ მხოლოდ მაქსიმალური სიჩქარე არ გვინტერესებს. მთავარია ის, თუ რამდენად ბუნებრივად, სტაბილურად და თავდაჯერებულად გრძნობს თავს მძღოლი ამ სიჩქარით გადაადგილებისას“, — განაცხადა Alpina-ს ვიცე-პრეზიდენტმა ოლივერ ფილეხნერმა.

ეს მკაფიო მინიშნებაა, რომ BMW-ს მფლობელობაში გადასული ახალი ეპოქის Alpina უბრალოდ BMW M-ის მორიგი ლამაზდისკებიანი ვერსია არ იქნება... ამის გახსენებაზე, რაც შეეხება დისკებს, ტესტებზე გამოჩენილ მოდელს სწორედ ასეთი, 20-დუიმიანი საფირმო დისკები ამშვენებს, რომლებიც სპეციალურ საბურავებშია „შეფუთული“. საბურავებს შიგნიდან დამატებითი ქაფის შრეც აქვს, რაც 300+ კმ/სთ სიჩქარეზე მოძრაობისას არა მხოლოდ უსაფრთხოებას, არამედ აკუსტიკურ კომფორტსა და რბილ სვლას უზრუნველყოფს.

კაპოტის ქვეშ კი ნამდვილი V8 ღრიალებს — სავარაუდოდ, BMW-ს 4.4-ლიტრიანი Twin-Turbo აგრეგატი, ყოველგვარი დამუხტვადი ჰიბრიდული დანამატების გარეშე. ფილეხნერმა ხაზგასმით აღნიშნა: „შიგაწვის ძრავი, კერძოდ V8, ჩვენი შეთავაზების ფუნდამენტური ბურჯია — სუფთა V8 ელექტროენერგიის გარეშე.“ მან ასევე დაამატა, რომ Alpina-ს ძრავი არ შეიძლება იყოს ზუსტად ისეთივე, როგორიც სტანდარტულ 7-Series-შია. სწორედ ამიტომ, შენიღბული კაპოტის ქვეშ დამალულმა V8-მ ძრავის მართვის ბლოკის უნიკალური კალიბრაცია მიიღო.

ამასთანავე, ინჟინრების მიზანი იყო, რომ სედანს მაქსიმალური სიჩქარე „აგრესიულობის გამოვლენის გარეშე“ განევითარებინა, ხოლო მისი კოლოსალური მაბრუნი მომენტი ბრუნთა მთელ დიაპაზონში თანაბრად გადანაწილებულიყო. ცვლილებები შეეხო ტრანსმისიასა და დაკიდებასაც, რომლებიც მაქსიმალურ კომფორტზეა გათვლილი. ძარამ მიიღო დახვეწილი აეროდინამიკური ელემენტები, ხოლო უკანა ნაწილში განთავსებული ოთხი გამოსაბოლქვი მილი უზრუნველყოფს იმ ღრმა, ძლიერ და ელეგანტურ ხმას, რაც Alpina-ს სედანებს ყოველთვის გამოარჩევდა.