ფერსტაპენმა „ფუჯი სპიდვეიზე“ Nissan-ის Super GT გამოცადა

Formula 1-ის ნიდერლანდელმა ჩემპიონმა, მაქს ფერსტაპენმა, „ფუჯი სპიდვეიზე“ Red Bull-ის მიერ ორგანიზებულ ტესტირებაზე Nissan-ის Z NISMO SUPER GT გამოცადა. რბოლა წვიმიან ამინდში, Toyota-ს საკუთრებაში არსებულ ტერიტორიაზე გაიმართა. მაქსი Red Bull-ის ვიზუალური ელემენტებით გაფორმებული Z NISMO-ს საჭესთან იჯდა, რომელიც 2025 წლის აეროდინამიკური სისტემითა და Bridgestone-ის საბურავებით იყო აღჭურვილი.

ასევე დაგაინტერესებთ: მაქს ფერსტაპენი ავტოსპორტის ერთ-ერთ ყველაზე სასტიკ რბოლაში ერთვება

ნიდერლანდელი უქმეებზე გასამართ იაპონიის გრან-პრიმდე Red Bull-ის სარეკლამო ღონისძიებაში მონაწილეობდა. ძლიერი წვიმის მიუხედავად, როგორც ჩანს, 650 ცხენის ძალის მქონე Super GT-ის საჭესთან ფერსტაპენმა რამდენიმე წრე წარმატებით დაფარა. ტესტირებებში მასთან ერთად Nissan-ის მრბოლელი, აცუში მიაკე მონაწილეობდა.

თუმცა, მაქსისთვის ეს არ იყო პირველი შემთხვევა, როდესაც მან რბოლისთვის მაღალი კლასის SUPER GT მოდელი გამოცადა. Formula 1-ის ოთხგზის ჩემპიონი 2022 წელს Honda-ს მადლიერების დღისადმი მიძღვნილ ღონისძიებაზეც გამოჩნდა, სადაც Honda NSX-GT-ის მართვის შესაძლებლობა მიეცა.

ხოლო „ფუჯი სპიდვეიზე“ მისი გამოჩენა Nürburgring Nordschleife-ზე, NLS2-ზე გამოსვლას მოჰყვა, სადაც მან თავისი გუნდის წევრებთან ერთად Racing Mercedes-AMG GT3 Evo-ს მოდელით პირველი გამარჯვებაც მოიპოვა. თუმცა, მოგვიანებით მისი გუნდი დისკვალიფიცირდა — მიზეზად წესებით დაშვებულზე მეტი, 6-ის ნაცვლად 7 კომპლექტი საბურავის გამოყენება დასახელდა.

ასევე იხილეთ: რატომაა Formula 1-ის პილოტობა თითქმის შეუძლებელი?

„ფუჯი სპიდვეიზე“ გამოყვანილი SUPER GT სპეციალურად Nakajima Racing-მა მოამზადა. ტესტირების შემდეგ ფერსტაპენმა ავტომობილის შესაძლებლობები შეაქო, რამაც სამომავლოდ SUPER GT-ში მისი შესაძლო მონაწილეობის შესახებაც გააჩინა მოლოდინები.