პოლიციამ ტეხასში ქუჩის რბოლა ჩაშალა | მფლობელებს სპორტქარები ჩამოერთვათ

თუ გადაწყვეტთ, რომ ქალაქის მაგისტრალი თქვენს პირად სარბოლო ტრასად აქციოთ, ნუ გაგიკვირდებათ, თუ ეს ყველაფერი ციმციმებით, ხელბორკილებითა და თქვენი ავტომობილის საჯარიმოზე გადაყვანით დასრულდება. სწორედ ასე მოხდა გასულ კვირას ჰიუსტონში, სადაც პოლიციამ ქუჩის რბოლა ზუსტად იმ მომენტში აღკვეთა, როცა სიჩქარის მაჩვენებლებმა სამნიშნა ციფრებს მიაღწია.

ასევე იხილეთ: ბანდა, რომელსაც პოლიცია ვერ აჩერებდა - შუა ღამის კლუბის ისტორია

ჰარისის ოლქის შერიფის ოფისის ინფორმაციით, რამდენიმე მძღოლი ოთხშაბათს დილით დააკავეს, როდესაც ისინი Interstate 610-ზე ერთმანეთს ეჯიბრებოდნენ. პოლიციამ რბოლის პროცესში მყოფი ჯგუფი დააფიქსირა, რომელთა სიჩქარეც 145-დან 160 კმ/სთ-მდე მერყეობდა.

სამართალდამცავებმა მფლობელებს სულ ხუთი ავტომობილი ჩამოართვეს. პოლიციის მიერ გავრცელებული ფოტოების მიხედვით, „დატყვევებულ“ მანქანებს შორის C8 Chevrolet Corvette, 2 ცალი Ford Mustang, Dodge Charger-ი და Chevrolet Caprice PPV მოხვდნენ. ყველა მძღოლი პატიმრობაში იმყოფება, ხოლო მათი ავტომობილები კონფისკაციის პროცესშია.

ტეხასში მოქმედი 2023 წელს მიღებული კანონი პოლიციას უფლებას აძლევს, დაუყოვნებლივ ჩამოართვას ავტომობილი ნებისმიერ პირს, რომელიც ქუჩის რბოლაშია ჩართული, და ხშირ შემთხვევაში, ეს ქონება სამუდამოდ სახელმწიფოს საკუთრებაში რჩება. ეს საკმაოდ მკაცრი სასჯელია ნებისმიერი ავტომოყვარულისთვის, თუმცა ციფრები აჩვენებს, რომ პრობლემა მზარდია.

მონტგომერის ოლქის პროკურორების განცხადებით, ბოლო 18 თვის განმავლობაში არალეგალური რბოლების რაოდენობა სტაბილურად იზრდება. 2025 წელს სულ 51 საქმე აღიძრა, ხოლო 2026 წლის მხოლოდ პირველ ოთხ თვეში ეს მაჩვენებელი უკვე 31-ს აღწევს. ჰარისის ოლქში კი მდგომარეობა კიდევ უფრო საგანგაშოა: თუ გასული წლის პირველ ოთხ თვეში 95 ბრალდება წარადგინეს, წელს იმავე პერიოდში ეს რიცხვი თითქმის გაორმაგდა და 174-ს მიაღწია.

ოფიციალური პირები ამ ზრდას სოციალურ ქსელებში პოპულარობის მოპოვების სურვილს უკავშირებენ. გზავნილი კი მარტივია — ტეხასის საჯარო გზებზე რბოლა ნიშნავს, რომ შესაძლოა თქვენი საყვარელი ავტომობილი სამუდამოდ დაკარგოთ.