აუქციონზე 1969 წლის Corvette L88 Coupe 1.1 მილიონად იყიდება

ავტომობილების სამყაროში არსებობს მოდელები, რომლებიც კოლექციონერებს აიძულებენ, თავიანთ საბანკო ბალანსსა და ცხოვრებისეულ პრიორიტეტებს გადახედონ. 1969 წლის Chevrolet Corvette L88 Coupe სწორედ ასეთია და ის 16 მაისს, Mecum-ის აუქციონზე გამოვა. მისი სავარაუდო ფასი 900 000-დან 1.1 მილიონ დოლარამდე იქნება, რაც ერთი შეხედვით, წარმოუდგენლად ჟღერს, თუმცა ამას თავისი სერიოზული მიზეზები აქვს.

რატომ არის L88 ასეთი ლეგენდარული?

ოფიციალურად, Chevrolet ამბობდა, რომ 427-კუბიანი V8 ძრავა 430 ცხენის ძალას გამოიმუშავებდა, თუმცა ეს ერთგვარი მარკეტინგული ხრიკი გახლდათ. ქაღალდზე ის უფრო სუსტად ჩანდა, ვიდრე შედარებით იაფი L71 ძრავა, მაგრამ რეალურად L88 გაცილებით მძლავრი იყო და მხოლოდ პროფესიონალი მრბოლელებისთვის იქმნებოდა.

1969 წელს L88 პაკეტი 1 032 დოლარი ღირდა, რაც იმ დროისთვის სოლიდური თანხა იყო. კომპანია არც კი ცდილობდა მის პოპულარიზაციას ჩვეულებრივ მყიდველებში — ეს იყო მანქანა მათთვის, ვინც ზუსტად იცოდა, რას უკვეთავდა. მოდელმა სახელი დეიტონასა და ლე მანის რბოლებშიც კი გაითქვა, რაც Corvette-ის ისტორიაში ოქროს ასოებით არის ჩაწერილი. სულ 1967-დან 1969 წლამდე მხოლოდ 216 ერთეული L88 ააწყვეს. 

ეს კონკრეტული კუპე Monza Red ფერშია გადაწყვეტილი და მისი გარბენი სულ რაღაც 22 540 მილს (დაახლოებით, 36 300 კმ) შეადგენს. ავტომობილი რესტავრირებული არ არის — მასზე დღემდე შემორჩენილია ქარხნული აღნიშვნები, რაც კოლექციონერებისთვის უძვირფასესი დეტალია. თავდაპირველი ძრავა არასოდეს ყოფილა დაშლილი ან მანქანიდან ამოღებული.

სიმძლავრეს უკანა თვლებს ლეგენდარული Muncie M22 Rock Crusher 4-სიჩქარიანი მექანიკური გადაცემათა კოლოფი აწვდის. 

მანქანის ბიოგრაფია ისეთივე შთამბეჭდავია, როგორც მისი მონაცემები. მისი პირველი მფლობელი აშშ-ის საზღვაო ძალების ადმირალი ფრენსის სანდერლინი იყო, რომელმაც ეს Corvette-ი 1970 წელს შეიძინა მას შემდეგ, რაც თავისი წინა, 1969 წლის ZL1 დაამტვრია. მას შემდეგ ავტომობილმა რამდენიმე ცნობილი კოლექციონერის ხელში გაიარა და უამრავი უმაღლესი ჯილდო დაიმსახურა, მათ შორის Bloomington Gold-ის სერტიფიკატი და დიდების დარბაზში მოხვედრა.