აუქციონზე უნიკალური BMW M5 E39 იყიდება

იმ დროს, როდესაც E39 თაობის BMW M5 თავის გზაზე ყველაფერს იმორჩილებდა, Volkswagen-ს თურმე მტკიცედ ჰქონდა გადაწყვეტილი, შეექმნა მისი კონკურენტი სუპერ-სედანი ექსპერიმენტული W10 ძრავით. თუმცა, იმ მომენტში გერმანულ ავტომწარმოებელს არ მოეპოვებოდა საკუთარი პლატფორმა, რომელზეც ამ აგრეგატს გამოცდიდა.

ასევე იხილეთ: BMW-ს ბურუსით მოცული წარსული და აქამდე უცნობი ფაქტები

ამიტომ, განსვენებული ფერდინანდ პიეხის — Bugatti Veyron-ის იდეური მამისა და უამრავი ლეგენდარული პროექტის ავტორის — პირდაპირი მითითებით, ექსპერიმენტული W10 ძრავი ჩადგეს... სწორედ E39 BMW M5-ის კაპოტის ქვეშ! სურათებზე სწორედ ეს ავტომობილია — W10 ძრავით აღჭურვილი E39 M5-ის პროტოტიპი, რომელსაც პირადად პიეხი მართავდა. ახლა კი ეს უნიკალური ეგზემპლარი აუქციონზე გასაყიდად გამოდის.

ქარხნული 5.0-ლიტრიანი V8-ის ნაცვლად, VW-მა სედანში ასევე 5.0-ლიტრიანი ატმოსფერული W10 ჩადო. ეს აგრეგატი 473 ცხენის ძალასა და 593 ნიუტონს გამოიმუშავებდა და უკანა თვლებს 6-სიჩქარიანი მექანიკური გადაცემათა კოლოფით უკავშირდებოდა. ეს მაჩვენებლები საგრძნობლად აღემატებოდა BMW M-ის ქარხნულ S62 ძრავს (394 ცხ.ძ. / 500 ნმ). გავრცელებული ინფორმაციით, ავტომობილში მოხსნილი და გათიშული იყო მოჭიდების კონტროლის, სტაბილიზაციისა და ABS-ის სისტემები.

როგორც ირკვევა, პროექტი არასდროს ყოფილა VW-ს ოფიციალური პროგრამა — ეს იყო უბრალოდ პიეხის პირადი სურვილი, რომლის შემუშავებაც, ცნობების თანახმად, დაახლოებით 2 მილიონი ევრო დაჯდა და მიუხედავად იმისა, რომ პროტოტიპია, ავტომობილი სრულად ფუნქციურია.

ავტომობილის სალონში BMW-ს ქარხნული ინტერიერი თითქმის უცვლელადაა შენარჩუნებული, თუ არ ჩავთვლით სპეციალურად დამზადებულ ინსტრუმენტების პანელს. მასზე ოდომეტრი საერთოდ არ არის, შესაბამისად, არავინ იცის, სულ რამდენი კილომეტრი აქვს გავლილი ამ M5-ს. ავტომობილის ამჟამინდელმა მფლობელმა ის დაახლოებით 10 წლის წინ შეიძინა, მას რეგულარულად მართავს (რაც ნამდვილად შექების ღირსია) და სრული ტექნიკური მომსახურება 2025 წელს ჩაუტარა.

Broad Arrow Auctions-ი ვარაუდობს, რომ მომავალ კვირას ბელგიაში გასამართ აუქციონზე ავტომობილი 215 000-დან 300 000 ფუნტ სტერლინგამდე ფასად გაიყიდება.