BMW-ს აშშ-ისა და ჩინეთის ბაზრებისთვის დიდი გეგმები აქვს

გასულ წელს BMW-მ შეერთებულ შტატებში რეკორდული რაოდენობის — 388 897 ავტომობილი გაყიდა, რაც წინა წელთან შედარებით 4.7%-იან ზრდას წარმოადგენს და ბრენდისთვის ზედიზედ მესამე რეკორდული წელია. თუმცა, მიღწეულ წარმატებაზე შეჩერებას გერმანული ბრენდი არ აპირებს და ოფიციალურად ადასტურებს, რომ სრულიად ახალი ფლაგმანური მოდელის ჩაშვებას განიხილავს.

ასევე იხილეთ: 7 ყველაზე ცუდი მანქანა, რაც „ბიემვის" ოდესმე შეუქმნია

კომპანიის მიერ გამოქვეყნებულ სიახლეებში აღნიშნულია, რომ BMW „განიხილავს“ ახალ მოდელს, რომელიც SUV-ების ხაზში X7-ის ზემოთ დაიკავებს ადგილს. ავტომწარმოებელს ბევრი დეტალი არ გაუმჟღავნებია, თუმცა აღნიშნა, რომ ეს ავტომობილი „მაქსიმალურად იქნება მორგებული ამერიკული ბაზრის საჭიროებებზე“. სავარაუდოდ, საუბარია BMW X8-ზე — მოდელზე, რომელზეც ინდუსტრიაში თითქმის ათი წელია ლაპარაკობენ, თუმცა დღემდე სერიულ წარმოებაში არ გამოჩენილა.

წლის დასაწყისში Audi-მ საბოლოოდ წარადგინა Q9 — BMW X7-ისა და Mercedes-Benz GLS-ის დიდხანს ნანატრი კონკურენტი. თუმცა, მიუხედავად იმისა, რომ BMW შესაძლოა X7-ზე უფრო დიდ მოდელზე მუშაობდეს, პრესრელიზში პირდაპირ არ არის ნათქვამი, რომ ის ზომით აუცილებლად Q9-ზე დიდი იქნება. ტექსტში მითითებულია, რომ მოდელი უბრალოდ „ამჟამინდელი ტოპ-მოდელის, BMW X7-ის ზემოთ დადგება“.

ახალი ფლაგმანური SUV ერთადერთი სიახლე არ არის, რომელზეც BMW მუშაობს — კომპანიამ წარადგინა განახლებული პორტფოლიო ჩინეთის ბაზრისთვის, სადაც ადგილობრივი მომხმარებლის მოთხოვნებია გათვალისწინებული. BMW-ს მიზანია, რომ 2030 წლისთვის ჩინეთში გაყიდული ავტომობილების 95% უშუალოდ ადგილზე იყოს აწყობილი.

გარდა ამისა, BMW-ს მიერ ბრენდის ყიდვის შემდეგ, მომავალ წელს Alpina-ს პირველი სრულიად ახალი მოდელი გამოვა. დადასტურებულია, რომ ის მე-7 სერიის პლატფორმას დაეფუძნება და პოზიციონირებით ჩვეულებრივ BMW-სა და Rolls-Royce-ს შორის განთავსდება. 2028 წლისთვის ევროპული ბაზარი მიიღებს სრულიად ახალ ხელმისაწვდომ ელექტრომობილსაც. ეს მოდელი გახდება Neue Klasse ოჯახის ახალი წევრი და გამოიყენებს იმავე ტექნოლოგიებს, რასაც სერიის სხვა ავტომობილები.