როგორ გამოიყურება მოპარული Corvette-ი, რომელმაც წყალქვეშ 5 წელი გაატარა?
მოპარული სპორტული ავტომობილის წლების შემდეგ პოვნა თავისთავად იშვიათი ამბავია, თუმცა როდესაც საქმე წყალქვეშ, მდინარის ფსკერზე აღმოჩენილ Chevrolet Corvette Grand Sport-ს ეხება, ისტორია ნამდვილ დეტექტივს ემსგავსება. ჯორჯიის შტატში, წყალქვეშა სამძებრო სამუშაოების დროს, მყვინთავებმა მდინარის ფსკერზე ძვირადღირებული სპორტქარი აღმოაჩინეს, რომელიც პოლიციის ბაზაში 2020 წლიდან მოპარულად ირიცხებოდა.
ავტომობილს ჯერემი საიდსმა მიაგნო, ორგანიზაცია Rapid Compassion Collective-ის დამფუძნებელმა. აღნიშნული ჯგუფი დაკარგული ადამიანებისა და ობიექტების წყალქვეშა ძებნით არის დაკავებული და ოჯახებს სრულიად უსასყიდლოდ ეხმარება. მორიგი ექსპედიციის დროს, საიდსმა მდინარის სიღრმეში უჩვეულო ობიექტი დააფიქსირა. აღმოჩნდა, რომ ნაკადის ქვეშ C7 თაობის Chevrolet Corvette Grand Sport იმალებოდა. მყვინთავმა კადრები თავის ინსტაგრამ გვერდზე გამოაქვეყნა, სადაც გამომწერებმა უმნიშვნელოვანეს დეტალს მიაქციეს ყურადღება.
View this post on Instagram
ვიდეოს გულდასმით დათვალიერებისას, ინტერნეტმომხმარებლებმა Corvette-ის წინა საქარე მინაზე ინსტაგრამის მომხმარებლის სახელი შეამჩნიეს. ენთუზიასტებმა კვალი მალევე იპოვეს: აღნიშნულ ანგარიშზე მიაგნეს 2020 წლის 11 დეკემბრით დათარიღებულ პოსტს, სადაც ავტომობილის მფლობელი იტყობინებოდა, რომ მისი C7 Corvette Grand Sport-ი მოიპარეს. ასე შეიკრა ჯაჭვი 5 წლის წინანდელ დანაშაულსა და მდინარის ფსკერზე ნაპოვნ სპორტქარს შორის.
მიუხედავად იმისა, რომ 5 წელი წყალში ყოფნა ნებისმიერი ავტომობილისთვის კატასტროფულია, ვიზუალურად კორვეტი იმაზე უკეთ გამოიყურებოდა, ვიდრე ვინმე ელოდა. განსაკუთრებული გამოხმაურება მოჰყვა ძარის დამცავ ფირს, რომელიც, ფაქტობრივად, ახალივითაა შენარჩუნებული. რა თქმა უნდა, 5 წლის განმავლობაში წყალქვეშ ყოფნა სრულად ანადგურებს ელექტრონულ სისტემებს, ძრავს, ტრანსმისიასა და ინტერიერს.
თუ როგორ აღმოჩნდა ავტომობილი მდინარის ფსკერზე და ვინ იდგა 2020 წლის ქურდობის მიღმა, ჯერჯერობით უცნობია. პოლიცია საქმის გამოძიებას განაგრძობს, თუმცა ყოფილ მფლობელს, სულ მცირე, უკვე აქვს პასუხი კითხვაზე, თუ სად გაუჩინარდა მისი საყვარელი სპორტქარი.
