BMW, Alpina
Aa
Aa

Alpina B8 Gran Coupe ავტობანზე 327 კმ/სთ-ს თავისუფლად ავითარებს

მდიდრული სედანი თავისი 4.4-ლიტრიანი ორტურბინიანი V8-თი 612 ცხენის ძალას გამოიმუშავებს.

შესაძლოა 2022 წლის Alpina B8 Gran Coupe-ს M-ის ემბლემები არ ამშვენებს, მაგრამ ეს ავტომობილი ნელი ნამდვილად არ არის. კორპუსის ქვეშ ის დიდ სიმძლავრეს მალავს, რომლის ამოფრქვევა BMW-ს სხვა სპორტული მოდელებისგან განსხვავებულია.

როგორც მოგეხსენებათ, მოდელი 4.4-ლიტრიანი ორტურბინიანი V8-თი არის აღჭურვილი. ის 612 ცხენის ძალასა და 800 ნიუტონ მეტრს გამოიმუშავებს. 2022 წლის B8 0-დან 100-მდე 3.3 წამში ჩქარდება და ის Alpina-ს ისტორიაში ერთ-ერთი ყველაზე სწრაფი მოდელია. მისი მაქსიმალური სიჩქარე კი 323 კმ/სთ-ს შეადგენს.

ახლა კი ერთ-ერთმა ცნობილმა „იუთუბერმა“ ეს ავტომობილი გერმანულ ავტობანზე გატესტა. მანქანა 200 კმ/სთ-ს თვალის დახამხამებაში ავითარებს. რაც ყველაზე საინტერესოა, მისი მაქსიმალური სიჩქარე იმაზე მეტია, ვიდრე კატალოგშია ნაჩვენები. ამ სიჩქარის მისაღწევად მძღოლს რამდენჯერმე დამუხრუჭება მოუწია. ვიდეოში კი უმაღლესი დონის სტაბილურობა და მდგრადობაც ჩანს.

Alpina-ს ამ მოდელში მხოლოდ წარწერები და ბრენდირება არ შეუცვლია. კომპანიის სპეციალისტებმა Eibach-ის ამორტიზატორები, დაკიდების სისტემის უფრო მდგრადი შემაერთებლები, გაძლიერებული განივი მდგრადობის სტაბილიზატორი და განახლებული ქვედა A-სებრი ბერკეტი დააყენეს. დისკები Alpina-ს 20-იანი და 21-იანი დისკებით ჩაანაცვლეს. დამუხრუჭებაზე კი Brembo-ს სისტემა ზრუნავს.

შეუდარებელია Alpina-ს საფირმო კორპუსის დანამატები. მას ჰაერის უფრო დიდი ზომის შემშვები არხებიც გამოარჩევს. განახლებული დიზაინი აქვს მაყუჩებსაც. სალონი ხის გაფორმებით, ლურჯი აქცენტებით, ალკანტარითა და Alpina-ს წარწერებითაა დამშვენებული.

2023 წლის Alpina B8 Gran Coupe-ს საწყისი ფასი 144 900 დოლარია და ამ ფასად თქვენ ერთ-ერთ საუკეთესო ავტომობილს შეიძენთ, რაც ამჟამად იყიდება. ეს არის მოდელი, რომელიც თავისი დიზაინით, სოლიდურობითა და კლასით გარანტირებულად მოგხიბლავთ. საჭირო მომენტში კი ადრენალინსაც ჭარბად მოგანიჭებთ.

კომენტარები

    იყავით პირველი, ვინც დაწერს კომენტარს

    მსგავსი სიახლეები

    ცხელი ამბები