BYD-ის რეკლამა Stellantis-სთან დაპირისპირების საგნად იქცა

საკამათო რეკლამები, როგორც წესი, უფრო დიდ ყურადღებას იპყრობს, ვიდრე სტანდარტული ვერსიები. თუმცა ერთ-ერთმა ასეთმა შემთხვევამ ჩინური ავტომწარმოებელი BYD უხერხულ მდგომარეობაში ჩააგდო. კომპანიამ იტალიაში დაიწყო კამპანია სახელწოდებით „ოპერაცია გასუფთავება“, რამაც Stellantis-ის გაღიზიანება გამოიწვია. ავტომწარმოებელმა საჩივრით Istituto dell’Autodisciplina Pubblicitaria (IAP)-ს მიმართა, რომელმაც რეკლამა აკრძალა.

BYD-მა რეკლამა უცნაური შეთავაზებისთვის გამოიყენა: თუ თქვენ BYD-ის ავტომობილს იყიდით და სანაცვლოდ ჩააბარებთ ძველ ავტომობილს, რომელსაც „სველი კბილა ღვედი“ (Wet Belt) აქვს, ავტომწარმოებლისგან 10 000 ევრომდე შეღავათს მიიღებთ. საქმე ისაა, რომ ეს შეთავაზება ზუსტად აღწერს Stellantis-ის PureTech ძრავებში გამოყენებულ ღვედის სისტემას. ეს ძრავები კი წარსულში ავტომობილების უკან გაწვევის მიზეზად არაერთხელ იქცა.

ამის საპირისპიროდ, BYD-ის კამპანიაში ისმოდა ისეთი ფრაზები, როგორიცაა: „გაქვთ სველი კბილა ღვედი? ვწუხვართ, რომ თქვენთვის ორშაბათი ყოველთვის ცუდად იწყება. აღმოაჩინეთ BYD-ის სპეციალური შეთავაზებები“.

IAP-მ დაადგინა, რომ ეს შეტყობინებები არღვევდა იტალიის სარეკლამო წესებს, რაც ცილისწამების შემცველი და შეცდომაში შემყვანი რეკლამების დარეგულირებას ითვალისწინებს. მიუხედავად იმისა, რომ BYD-მა განაცხადა, რომ ეს უბრალოდ ელექტრომობილებზე გადასვლის წამახალისებელი კამპანია იყო, მარეგულირებლებმა იგი კონკურენტზე პირდაპირ, უსამართლო თავდასხმად მიიჩნიეს და მისი აკრძალვის გადაწყვეტილება ძალაში დატოვეს.