ამ BMW-ების ფასები ბოლო რამდენიმე თვეში რეკორდულად გაიზარდა — მიზეზები

საავტომობილო ინდუსტრიაში არსებობს არაერთი ავტომობილი, რომელიც დროთა განმავლობაში არათუ ბერდება, არამედ აქტუალობას არასდროს კარგავს და ნამდვილ კულტად იქცევა ხოლმე. BMW-მ თავისი სახელი სწორედ ისეთი მანქანების შექმნით გაითქვა, რომლებიც ყოველდღიურ პრაქტიკულობასა და მართვისგან მიღებულ სუფთა, ანალოგურ სიამოვნებას იდეალურად აერთიანებდნენ.

ასევე იხილეთ: BMW-ს ისტორიაში საუკეთესო ძრავები (ნაწილი 2)

ადრეულ ეპოქაში ბავარიელები აქცენტს ექსკლუზიურად ატმოსფერულ ძრავებზე აკეთებდნენ, რაც საჭის ბასრ რეაქციასა და აქსელერატორის მომენტალურ პასუხს უზრუნველყოფდა. დღეს, როდესაც თანამედროვე მოდელები ტურბოებით, სრული ამძრაობითა და ჭარბი წონით იტვირთება, 90-იანებისა და 2000-იანების კლასიკური რეცეპტი კოლექციონერებისთვის ოქროს ფასად ფასობს. ამის საუკეთესო მაგალითი საკულტო BMW Z3 M Coupe-ია, რომლის ღირებულებაც ბოლო პერიოდში ასტრონომიულად გაიზარდა.

„კლოუნის ფეხსაცმელი“, რომელმაც ფასების ბუმი გამოიწვია

სტანდარტული Z3 როდსტერი ბრენდის ისტორიაში საუკეთესო მანქანად არასოდეს ითვლებოდა, თუმცა მისმა კუპე ვერსიამ ყველაფერი შეცვალა. მყარმა სახურავმა ავტომობილის კონსტრუქციას უდიდესი სიმტკიცე შესძინა, რამაც სავალი ნაწილის მუშაობა და მძღოლთან უკუკავშირი სრულიად სხვა დონეზე აიყვანა. კრის ბენგლის მიერ შექმნილმა უნიკალურმა Shooting Brake სილუეტმა — გრძელი კაპოტითა და მაღალი, მასიური უკანა ნაწილით — ენთუზიასტებისგან მოფერებითი ზედმეტსახელი „კლოუნის ფეხსაცმელი“ დაიმსახურა.

Hagerty-ის სააუქციონო მონაცემებით, დღეს, 2026 წელს, ამ მანქანის ფასები შემდეგნაირად გამოიყურება:

• ადრეული მოდელები (1999-2000): აღჭურვილია 240-ცხენისძალიანი S52 ძრავით. კარგ მდგომარეობაში მათი ფასი 32 000 დოლარს აღწევს (9%-იანი ზრდა გასულ წელთან შედარებით), ხოლო იდეალური ეგზემპლარები, დაახლოებით, 77 000$-ად ფასობს. Classic.com-ზე საშუალო სააუქციონო ფასი ბოლო 12 თვეში 8 000 დოლარით გაიზარდა.
• გვიანდელი მოდელები (2001-2002): აქ უკვე ლეგენდარული 3.2-ლიტრიანი S54 აგრეგატი გვხვდება, რომელიც 315 ცხენის ძალას გამოიმუშავებს. კარგი ვერსიები $46 500 ღირს, ხოლო სამუზეუმო მდგომარეობის, მინიმალური გარბენის მქონე მოდელების ფასი 140 000$-ს უახლოვდება (ფასების 10%-იანი მატება ერთ წელში).

რატომ იხდიან კოლექციონერები დიდ თანხებს?

ამ ფენომენის უკან რამდენიმე მიზეზი დგას — პირველ რიგში, აღსანიშნავია მოდელის ექსკლუზიურობა და იშვიათობა — ჯამში სულ 6 291 ერთეული Z3 M Coupe დამზადდა, საიდანაც ამერიკულ ბაზარზე მხოლოდ 2 851 მოხვდა. S54 ძრავით აღჭურვილი ვერსიები კი კიდევ უფრო იშვიათია — აშშ-ში სულ 621 ასეთი მანქანა გაიყიდა. 

გარდა ამისა, კოლექციონერები განსაკუთრებულ თანხებს იხდიან იშვიათ შეფერილობებშიც. მაგალითად, S54 ძრავისა და საკულტო Estoril Blue ფერის კომბინაციით მხოლოდ 123 მანქანა გამოვიდა, ხოლო Dakar Yellow ყვითელ ფერში — სულ რაღაც 51 ერთეული.

BMW M3 (E46) — კიდევ ერთი ანალოგური გმირი

Z3 M Coupe-ის პარალელურად, ფასების ანალოგიურ ნახტომს განიცდის მისი თანამედროვე BMW M3 (E46). მიუხედავად იმისა, რომ E46 ბევრად უფრო მასობრივი პროდუქტი იყო (მხოლოდ აშშ-ში 44 000 ერთეული გაიყიდა), მისი ფასები მაღალი ტემპით იზრდება.

იგივე მაღალბრუნიანი S54 ძრავა, მექანიკური გადაცემათა კოლოფი და უკანა ამძრაობა მას იდეალურ სარბოლო და ყოველდღიურ მანქანად აქცევს. Hagerty-ის მიხედვით, 2001 წლის კარგ მდგომარეობაში მყოფი E46 M3-ის ფასი $31 000-მდე გაიზარდა, ხოლო საუკეთესო საგამოფენო ეგზემპლარებმა ერთ წელში ფანტასტიკური 34%-იანი ზრდა აჩვენეს და $70 000-დან $90 000-მდე ფასობენ. წარმოების დასასრულს გამოშვებული 2006 წლის საუკეთესო მოდელები კი უკვე 130 000 დოლარადაც ფასდება.

როგორც ჩანს, ძველი ბავარიული სკოლის ფასეულობა მომავალში მხოლოდ გაიზრდება. „კლოუნის ფეხსაცმელი“ და E46 M3 სწორედ იმ ეპოქის სიმბოლოებია, როდესაც მანქანის მართვა ნამდვილი ხელოვნება იყო.