ეს არც ისე რთულია: როგორ გავასუფთაოთ ძრავა
ავტომობილის ბევრი მფლობელი ძრავის საკუთარი ხელით გაწმენდისგან თავს იკავებს. ძრავას ბევრი დეტალი უერთდება და ამ ყველაფრის გაწმენდაზე ფიქრიც კი ზოგისთვის დამღლელია. სინამდვილეში კი, ავტომობილის მოვლისას, ძრავის დასუფთავება ერთ-ერთი ყველაზე მარტივი ნაწილია. სულ რამდენიმე რჩევის გათვალისწინებით, სასურველი შედეგის მიღება არ გაგიჭირდებათ.
დღევანდელი ძრავები ისეთი აღარაა, როგორც წინათ. თუ კარგად დააკვირდებით, შეამჩნევთ, რომ მათი გაწმენდა ასე ადვილი არასდროს ყოფილა.
- ძრავის დიდი ნაწილი პლასტმასითაა დაფარული.
- ელექტროდამაკავშირებლები მყარი პლასტმასით მთლიანად დაცულია.
- ანთების ელექტრონული სისტემა ძველებურ კარბურატორებსა და მანაწილებლებს გამორიცხავს.
- ალტერნატორი ერთადერთი მგრძნობიარე და განსაკუთრებით საფრთხილო ნაწილია.
თანამედროვე ძრავები წყლისგან, ჭუჭყისა და სხვა საზიანო ელემენტებისგან მაქსიმალურად დაცულია. ალტერნატორი ერთადერთი დეტალია, რომელიც შესაძლოა რისკის შემცველი იყოს, თუმცა კარგი ამბავი ისაა, რომ იგი წყალთან პირდაპირი შეხებისას დიდ საფრთხეს არ წარმოადგენს.
1. არასდროს გაწმინდოთ ცხელი ძრავა. ძრავის გასასუფთავებლად საუკეთესო დრო დილაა, როდესაც ავტომობილი მთელი ღამის განმავლობაში გაჩერებული იყო. ცხელ ძრავაზე ცივი წყლის დასხმა რეკომენდებული არ არის, რადგან ტემპერატურის მკვეთრმა ცვლილებამ შესაძლოა მიკრობზარები გამოიწვიოს. ზოგჯერ გაწმენდამდე ძრავის ოდნავ შეთბობას გვირჩევენ — თუ ამ გზას აირჩევთ, გაითვალისწინეთ, რომ ძრავა მხოლოდ მცირედით უნდა იყოს თბილი. თუ ის ზედმეტად ცხელია, ცხიმგამცლელი საშუალება (ე.წ. „დეგრიზერი“) სწრაფად გაშრება და ზედაპირზე ლაქებად დარჩება.
2. სანამ გაწმენდას დაიწყებთ, დაფარეთ ალტერნატორი, ფილტრები და ჰაერის შემწოვი სისტემა. ეს ის ნაწილებია, რომლებშიც წყლის ან ცხიმგამცლელი საშუალების მოხვედრა დაუშვებელია. ამიტომ, საიმედოდ დაფარეთ ისინი პოლიეთილენის პარკით ან სხვა წყალგაუმტარი მასალით.
3. დაიწყეთ ძრავის გასუფთავება ცხიმგამცლელი საშუალებით. განსაკუთრებული ყურადღებით გაწმინდეთ სითხეების კონტეინერები და მილები, რადგან ეს დეტალები ყველაზე მეტად ბინძურდება. არ დაგავიწყდეთ ძრავის უკანა მხარის გაწმენდაც — დასუფთავებისას ეცადეთ, მაქსიმალურად მიწვდეთ რთულად მისადგომ ადგილებს.
4. კარგია, თუ სპეციალურად ძრავისთვის განკუთვნილ საწმენდ საშუალებას გამოიყენებთ. იმ ადგილებს, რომლებსაც ხელით ვერ მიწვდებით, ჯაგრისით გაწმინდეთ. ეს ჯაგრისი აუცილებლად რბილი უნდა იყოს, რადგან უხეში ჯაგრისი პლასტმასზე ნაკაწრებს გააჩენს.
გასაწმენდად კარგი იქნება, თუ სპრეის ბოთლში საპნიან წყალს ჩაასხამთ — ხელით წმენდის პროცესში ეს ყველა საჭირო წერტილთან მიწვდომაში დაგეხმარებათ. სასურველია, რამდენიმე პირსახოციც გქონდეთ, რათა ბოლოს ზედაპირი კარგად გაამშრალოთ.
5. მას შემდეგ, რაც ყველაფერს გაწმენდთ, გაპრიალების დრო დგება. პლასტმასის ზედაპირებისა და მილების კარგად გასაპრიალებლად გაწმინდეთ ისინი ფრთხილად და დარწმუნდით, რომ ისინი სიცხისგან, ლაქებისა და ჭუჭყისგან დაცულია.
ამ ყველაფრის შემდეგ ძრავა ახალივით გამოიყურება. ამ პროცედურის წყალობით, შემდგომში, გარკვეული პერიოდის განმავლობაში, ტილოს უბრალო გადასმაც კი საკმარისი იქნება. რა თქმა უნდა, ამ პროცესს დრო და შრომა სჭირდება, მაგრამ შედეგი ნამდვილად ღირს ამად.
