1965 წლის Mustang-ი მჟავაში „აბანავეს“ და ჟანგი სრულად მოაშორეს

ავტომობილების დასუფთავებისა და აღდგენის ვიდეოებით ინტერნეტი ნამდვილად სავსეა — იქნება ეს მიტოვებული Ferrari 330-ის აღდგენა თუ Rolls-Royce-ის გაპრიალება, ასეთი კადრები აუდიტორიის ყურადღებას ყოველთვის იპყრობს. თუმცა, საღებავის მოშორების სპეციალისტის, ტრევორ მალოის მიერ ჩატარებული სამუშაო ის არის, რასაც ხშირად ნამდვილად ვერ ნახავთ.

მალოის, რომელსაც სოციალურ ქსელში 476 000-ზე მეტი გამომწერი ადევნებს თვალს, ჟანგის მოშორების უამრავი ვიდეო აქვს გამოქვეყნებული, თუმცა 1965 წლის Fastback Mustang-ის შემთხვევა განსაკუთრებულია — სრულად დაჟანგული და სავალალო მდგომარეობაში მყოფი ძარა ჯერ მჟავის სპეციალურ ავზში ჩაიძირა, რამაც კოროზიის და ძველი საღებავის ფენების ქიმიური დაშლა გამოიწვია.

View this post on Instagram

A post shared by Trevor Malloy (@minute_of_dangle)

ავზიდან ამოღების შემდეგ კი ძარას მაღალი წნევის წყლის ჭავლი მიუშვირეს, რამაც ჟანგი თვალის დახამხამებაში ჩამორეცხა. ვიდეოს ბოლოს ავტომობილს ჟანგის კვალიც კი აღარ ეტყობოდა და ფოლადის ძარამ პირვანდელი ბზინვარება დაიბრუნა — თუმცა, სამართლიანობისთვის უნდა ითქვას, რომ მანქანას ამ ეტაპზე მხოლოდ ჩონჩხი შერჩა და მის სრულფასოვან აღდგენამდე ჯერ კიდევ ძალიან შორია.

ვიდეოს თავად Ford Mustang-ის ოფიციალური ინსტაგრამ-გვერდიც გამოეხმაურა, რომელმაც კომენტარებში იხუმრა: „მადლობა აბაზანისთვის“.