Ford Maverick-ს პრობლემები აქვს — სეგმენტში RAV4-ზე დაფუძნებული პიკაპით შესვლას Toyota-ც აპირებს

კომპაქტური პიკაპების სეგმენტი, რომელიც Ford-მა 2021 წელს Maverick-ის გამოშვებით გააცოცხლა, დღეს ავტოინდუსტრიის ერთ-ერთი ყველაზე ცხელი წერტილია. Ford-ისთვის ეს ნამდვილი ოქროს საბადო აღმოჩნდა, რადგან გასულ წელს ამერიკაში 155 051 Maverick-ი გაიყიდა, რაც წინა წელთან შედარებით მნიშვნელოვანი ზრდაა და ამ პატარა პიკაპმა გაყიდვებით Ranger-ს ორჯერ აჯობა.

ასევე იხილეთ: როგორ გაანადგურეს სამოქალაქო პიკაპებმა მუამარ კადაფის ტანკები?

ამ წარმატების ფონზე, Hyundai-ს მცდელობა Santa Cruz-ით ნაკლებად შთამბეჭდავი აღმოჩნდა, რადგან გასულ წელს მხოლოდ 25 499 ერთეული გაიყიდა. ამან გააჩინა ხმები, რომ სამხრეთკორეული ავტომწარმოებელი, შესაძლოა, ამ მოდელის წარმოების ნაადრევად შეწყვეტას და საშუალო ზომის პიკაპზე გადართვას გეგმავდეს. თუმცა, იქ, სადაც სხვები დაბრკოლდნენ, Toyota დიდ შესაძლებლობას ხედავს.

Toyota Motor North America-ს დირექტორმა, ტეცუო ოგავამ დაადასტურა, რომ RAV4-ზე დაფუძნებული პიკაპი კომპანიისთვის სერიოზული შანსია. მისი თქმით, დილერები მოუთმენლად ელიან ასეთ მოდელს, თუმცა მის შექმნას დრო სჭირდება. თუკი ეს პროექტი განხორციელდება, ტექნიკური მონაცემები Maverick-ისთვის საკმაოდ სახიფათო იქნება. ახალი RAV4-ის ჰიბრიდული სისტემა 226-დან 236 ცხენის ძალამდე გამოიმუშავებს, მაშინ როცა Maverick Hybrid-ის მაქსიმუმი 191 ცხენის ძალაა. საწვავის ეკონომიის მხრივაც RAV4-ის მაჩვენებლები უკეთესია, ვიდრე Ford-ის ანალოგის.

გარდა ამისა, არ უნდა დაგვავიწყდეს დამუხტვადი ჰიბრიდული ვერსიაც, რომელიც 324 ცხენის ძალას გამოიმუშავებს და 84 კმ-ს მხოლოდ ელექტროენერგიით გადის, რაც კომპაქტური პიკაპების სეგმენტში სრულიად ახალი სიტყვა იქნება. Toyota-სთვის RAV4-ის პლატფორმის გამოყენება საკმაოდ ლოგიკურია, რადგან ის უკვე გამოცდილია და საშუალებას მისცემს იაპონურ ბრენდს, Maverick-ს არა მხოლოდ გამძლეობით, არამედ ტექნოლოგიური უპირატესობითაც დაუპირისპირდეს.